رووداو دیجیتاڵ
بەڕێوەبەری گشتیی بەنداو و کۆگەکانی ئاو رایگەیاند، لەم وەرزەی بارانباریندا 1.5 ملیار مەتر سێجا ئاو لە بەنداوەکانی هەرێمی کوردستان گلدراوەتەوە. هەروەها بەهۆی زۆریی بارانەوە، زۆربەی بەنداوە بچووکەکان سەرڕێژیان کردووە.
رەحمان خانی، بەڕێوەبەری گشتیی بەنداو و کۆگەکانی ئاو لە هەرێمی کوردستان، ئەمڕۆ یەکشەممە بە تۆڕی میدیایی رووداوی راگەیاند، "لە وەرزی بارانبارینی ئەم ساڵدا، بڕی یەک ملیار و 500 ملیۆن مەتر سێجا ئاو لە بەنداوەکاندا گلدراوەتەوە."
بەگوێرەی ئامارەکانی بەڕێوەبەرایەتییەکە، 25 بەنداو لە هەرێمی کوردستان هەن؛ هەرچەندە زۆربەی ئاوەکە لە چوار بەنداوە گەورەکە (دووکان، دەربەندیخان، گۆمەسپان و دهۆک) کۆکراوەتەوە، بەڵام بەهۆی زۆریی رێژەی بارانبارینەوە، زۆربەی بەنداوە بچووکەکان پڕبوون و سەرڕێژیان کردووە.
بەشێک لەو بەنداوە بچووکانەی کە بۆ ئاودێری و حەوزی ماسی سوودیان لێ وەردەگیرێت و سەرڕێژیان کردووە، بریتین لە: (جەلی، دێگەڵە، چەمرگە، ئاقوبان، حەمامۆک، بەستۆرە و شیوە سوور) لە هەولێر؛ (دێوانە، ئاوەسپی، باوەشاسوار، حەسەن کەنووش، چەمی سمۆر و قادر کەرەم) لە سلێمانی؛ هەروەها (خنس، بێدۆهی و کەشکان) لە دهۆک.
ئەم ساڵ رێژەی بارانبارین لە تەواوی باشووری کوردستان بەراورد بە پار زیادبوونی بەرچاوی بەخۆیەوە بینیوە، بەجۆرێک لە زۆربەی ناوچەکان دوو هێندە و لە هەندێک ناوچەش سێ هێندەی وەرزی پێشوو باریوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ