رووداو دیجیتاڵ
ئەو عەرەبە هاوردانەی لە پەلکانەی سنووری کەرکووک دەیانویست خێوەت هەڵبدەن و مانبگرن، لەنێو خۆیان بووە شەڕیان و شەش کەسیان لە یەکدی بریندار کرد. هاوردەکان تەماحیان لە زەویی جووتیارانی کورد داوە و دەیانەوێ داگیری بکەن.
هاوردەکان ژمارەیان 60 کەس بوو. دوای نیوەڕۆی رۆژی چوارشەممە، 08-05-2024، بە پاڵپشتیی سوپای عێراق، لەسەر زەویی جووتیارێکی کورد لە پەلکانە کۆبوونەوە. هێزێکی زۆری ئەمنی لە گوندەکە بڵاوەی پێکراوە.
فەرهاد ئیسماعیل، دانیشتووی گوندی پەلکانە بە رووداوی گوت: "هێزێکی زۆری سوپایان لەگەڵ بوو، بەرگریی لەوان دەکرد، کە زانیمان نیازیان خراپە، چووینە سەریان و سوپاس بۆ خوا شکستمان بە هەوڵەکەیان هێنا. ئەوان بوونە دوو بەرە، هەندێکیان دەیانگوت با خێوەتە هەڵبگرین، چونکە ژمارەی کوردەکان زۆرە و هەندێکیان دەیانگوت نا با بمێنین، ئەمەش بووە هۆکاری دروستبوونی شەڕ لە نێوانیان".
حەوت ساڵە لەگەڵ نزیکبوونەوەی وەرزی دروێنە، عەرەبی هاوردە دەچنە سەر زەویی کورد و دەیانەوێت دەستی بەسەردا بگرن. هەوڵی ئەمجارەشیان بێ ئەنجام بوو.
دەشتی جەمیل، دانیشتووی گوندی پەلکانە دەڵێت: "لەدوای 16ـی ئۆکتۆبەرەوە ئەمە حەوت ساڵە هیچیان بەدەستنەهێناوە و دەیانەوێ بە گوشاری خۆپێشاندان وای نیشانبدەن کە ئێمە وەکو کورد غەدریان لێدەکەین، چەندین جار لە ئۆپەراسیۆنەکانی
سوپای عێراق بانگکراوین و داوامان لێکراوە پشک بە هاوردەکان بدەین، بەڵام ئێمە بەمە رازی نین و پێیان نادەین، چونکە ئەمە زەوی و موڵکی ئێمەیە".
کورد لە پەلکانە تاپۆی رەشی زەوییەکانی هەیە، بەڵام لەدوای رووداوەکانی 16ـی ئۆکتۆبەرەوە عەرەبی هاوردە دەیانەوێت دەست بەسەر زەوییەکانیاندا بگرن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ