رووداو دیجیتاڵ
دانیشتوویەکی گوندی ماستاوای سەر بە ناحیەی شەمامک دەڵێ، 15 رۆژە چەند گوندێک لە سنوورەکە بێ کارەبان. بەڕێوەبەری کارەبای شەمامک دەڵێ، کۆیلی بگۆڕی وێستگەکە سووتاوە و لەم یەک دوو رۆژەدا چاکدەکرێتەوە.
هاونیشتمانییەکی دانیشتووی گوندی ماستاوای شەمامک لە پارێزگای هەولێر بە رادیۆی رووداوی راگەیاند: "15 رۆژە وێستگەیەکی جووڵاوی کارەبا لە گوندەکەمان سووتاوە و کارەبامان نییە. بەهۆی بێ کارەباییەوە ئاوی کێڵگە کشتوکاڵییەکانمان نەداوە و تەنانەت ئاوی خواردنەوەشمان نییە، ناچارین بە دەبە ئاو لە شوێنی دیکەوە بهێنین."
دەریا محەممەد، بەڕێوەبەری فەرمانگەی کارەبای شەمامک، لەو بارەیەوە بە رووداوی گوت: "کۆیلی محاویلەی وێستگەکە سووتاوە. لە هەوڵداین بۆ ئەوەی بەزوویی گرفتەکە چارەسەر بکەین و ئێستا پارچە سووتاوەکە لە وەرشەیە بۆ چاککردنەوە و لەم یەک دوو رۆژەدا تەواو دەبێت."
سەبارەت بە ماوەی بێ کارەبایی ئەو گوندانەی سنووری ناحیەی شەمامک، بەڕێوەبەری کارەبای ناحیەکە دەڵیت: "ئەوەندە نییە 15 رۆژ بێ کارەبا بن، بەڵکو هەوڵمانداوە بەشێوەی نۆرە لەرێگەی فیدەر و وێستگەکانی دیکەوە کارەبایان بۆ دابین بکەین." دڵنیاییشیدا کە "هەموو هەوڵێکمان ئەوەیە بە زوویی گرفتەکە چارەسەر بکەین."
دەریا محەممەد ئاماژەی بە باشبوونی دۆخی کارەبا لە سنوورەکەدا کرد و گوتی: "ئێستا بەراورد بە رابردوو، دۆخی کارەبای سنوورەکەمان زۆر باشتر بووە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ