رووداو دیجیتاڵ
پەیامنێری رووداو لە بەغدا رایگەیاند، لەسەر گۆڕانکارییەکانی ماددەی 14ی پڕۆژەیاسای بودجە لەنێو دانیشتنی پەرلەماندا گفتوگۆی تووند و گرژی دروستبوو، بەهۆیەوە بۆ ماوەیەک دانیشتنەکە هەڵگیرا، بەڵام دوای ماوەیەک زەنگی چوونەژوورەوە لێدرا و دانیشتنەکە دەستیپێکردووە.
یەکێک لە بڕگەکانی ماددەی 14 تایبەتە بە پاشەکەوتی مووچەی فەرمانبەرانی هەرێمی کوردستان و زۆرترین گفتوگۆی لەسەر دەکرێت لەنێو پەرلەماندا. راگەیاندنی پەرلەمانی عێراق دەڵێت، گفتوگۆ لەسەر ماددەکە بەردەوامە.
ماددەی 13 زوو پەسند کرا کە کە تایبەتە بە پاکتاوکردنی خەرجییەکان، داهات و هەناردەکردنی نەوت و شایستە داراییەکانی هەرێمی کوردستان.
مادەی 13ـی رەشنووسی بودجەکە لە دوو بڕگە و شەش خاڵ پێکدێت کە بەمشێوەیەیە:
- یەکەم: شایستە داراییەکانی نێوان حکومەتی فیدراڵیی عێراق و حکومەتی هەرێمی کوردستان لە ساڵانی 2004 تاوەکو 2022 یەکلایی دەکرێنەوە، دوای وردبینیکردنی لەلایەن دیوانی چاودێریی دارایی عێراق بە هاوئاهەنگی لەگەڵ دیوانی چاودێریی هەرێمی کوردستان، بە پشتبەستن بەو ماف و پابەندبوونانەی لە یاساکانی بودجەی فیدراڵیی هەموو ساڵێک هاتووە.
- ئـ - حکومەتی هەرێمی کوردستان بە هاوئاهەنگی لەگەڵ وەزارەتی نەوتی عێراق پابەند دەبێت بە بارکردنی نەوتی خاوی بەرهەمهاتوو لە کێڵگەکانی هەرێمی کوردستانەوە بۆ کۆگاکانی سۆمۆ لە بەندەری جەیهانی تورکی و بە لانیکەم کەمتر نەبێت لە 400 هەزار بەرمیل. کۆمپانیای سۆمۆ ئەو بڕە بە هاوئاهەنگی لەگەڵ وەزارەتی سامانە سرووشتییەکان و بە هەمان میکانیزمەکانی کۆمپانیاکە هەناردە دەکات.
ب - ئەگەر هەناردەی نەوتی کوردستان لە رێگەی بەندەری جەیهان یان هەر بەندەرێکی دیکەی فەرمی کە وەزارەتی نەوت دیاری دەکات، نەکرێت، ئەو کاتە حکومەتی هەرێمی کوردستان ئەو بڕە نەوتە دەدات بە وەزارەتی نەوتی عێراق بۆ بەکارهێنانی نێوخۆ بەپێی ئەو پێویستییەی وەزارەتی نەوت دیاری دەکات.
ج- وەزارەتی دارایی عێراق قەرەبووی تێچووی بەرهەمهێنان و گواستنەوەی بڕی نەوتی بەرهەمهاتوو لە هەرێمی کوردستان کە لەلایەن وەزارەتی نەوتەوە وەردەگیرێت، دەکاتەوە، بەو پێیەی تێچووی بەرهەمهێنان و گواستنەوە یەکسان بێت لەگەڵ تێکڕای تێچووی بەرهەمهێنان و گواستنەوەی نەوت لە وەزارەتی نەوتی عێراق.
د- حکومەتی هەرێمی کوردستان پابەند دەبێت بە رادەستکردنی داهاتە نانەوتییەکان بە گەنجینەی دەوڵەت بەپێی یاسای بەڕێوەبردنی دارایی.
و- قەرزەکانی سەر حکومەتی هەرێمی کوردستان کە قەرزی بانکی عێراقی بۆ بازرگانی و بانکە حکومی و تایبەتەکانە، مانگانە بە قیست لە پشکی هەرێمی کوردستان دەبڕدرێت و دانەوەی ئەو قەرزانە لە ساڵی 2023ەوە و دەستپێدەکات لە ماوەی حەوت ساڵ دەدرێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ