کوردستان
دەنگدانی هاونیشتمانییان لە بنکەیەکی دەنگدان لە کەرکووک لە هەڵبژاردنەکانی رابردوودا. وێنەکە ئەرشیڤە و بۆ روونکردنەوەی هەواڵەکەیە: بڵند تاهیر - رووداو
رووداو دیجیتاڵ
لیژنەی ئەمنیی قایمقامیەتی چەمچەماڵ داوا لەو کەسانە دەکات کە دەنگیان لە کەرکووکە، ئەمڕۆ بگەڕێنەوە شارەکە و لە دەنگدانی گشتیی دەنگ بدەن. قایمقامی قەزاکە دەڵێت، "سەر و ماڵیان پارێزراو دەبێت."
رەمک رەمەزان، قایمقامی قەزای چەمچەماڵ لە پارێزگای سلێمانی، ئەمڕۆ یەکشەممە 09-11-2025 بە تۆڕی میدیایی رووداوی گوت، "43 هەزار دەنگدەری کەرکووک لە سنوورەکەمان دەژین، داواکارین هەرچی زووە بگەڕێنەوە بۆ کەرکووک و بەشداری بکەن لە دەنگدانی گشتیدا."
قایمقامی چەمچەماڵ گوتی، "دڵنیایی دەدەینە هاونیشتمانییان، کە لەلایەن هێزە ئەمنییەکانەوە سەر و ماڵیان پارێزراو دەبێت و دەتوانن بچنەوە کەرکووک بۆ دەنگدان."
بڕیارە 11ی ئەم مانگە، دەنگدانی گشتی بۆ پەرلەمانی عێراق، لە عێراق و هەرێمی کوردستان بەڕێوەبچێت.
لیژنەی ئەمنیی چەمچەماڵ رایگەیاند، "ئاگاداری سەرجەم ئەو خێزانانە دەکەین کە دەنگدانیان پارێزگای کەرکووکە و دانیشتووی چەمچەماڵن، دەتوانن لە ئەمڕۆوە بگەڕێنەوە بۆ دەنگدان، بۆ ئەو مەبەستە سەرجەم هێزە ئەمنییەکان لە ئەرکدا دەبن و دڵنیایی دەدەین سەر و ماڵیان پارزێراو دەبێت."
لە راگەیێندراوەکەدا ئاماژە بەوە کراوە، جگە لە پۆلیس، هێزەکانی ئاسایشی رۆژئاوای سلێمانی لە ناوەندی قەزای چەمچەماڵ و ناحیەکانی دەوروبەری، گەڕانی بەردەوامیان دەبێت بۆ رێگریکردن لە هەر رووداوێکی نەخوازراو یان دزیکردن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ