رووداو دیجیتاڵ
جێگری پارێزگاری سلێمانی دەڵێت، دووشەممەی داهاتوو، سەرجەم زیانلێکەوتووانی ئاگرکەوتنەوەکەی بازاڕی دارەسووتاوەکە قەرەبووەکانیان وەردەگرن. گوتیشی، دووکانەکان لە پاشماوەی ئاگرکەوتنەوەکە پاککراونەتەوە.
ئەمڕۆ پێنجشەممە 10-04-2025، شاهۆ عوسمان، لە کۆنفرانسێکی رۆژنامەڤانیدا لەبارەی ئاگرکەوتنەوەکەی 5ـی نیسانی بازاڕی دارەسووتاوەکەی سلێمانی رایگەیاند، ''ئێستا شوێنی رووداوەکە پاککراوەتەوە و تەنیا ماوەتەوە زیانلێکەوتووان قەرەبووبکرێنەوە.''
پێشتر نووسینگەی قوباد تاڵەبانی، جێگری سەرۆکوەزیرانی هەرێـمی کوردستان بڵاوی کردبووەوە کە بەگوێرەی ئەو راپۆرتەی بەرگریی شارستانی لەبارەی رووداوەکەوە ئامادەی کردووە، لە ئاگرکەوتنەوەکەدا زیان بە 116 دووکان و چوار شوێنی دروستکردنی خواردنی خێرا کەوتووە، کە بە بڕیاری قوباد تاڵەبانی سەرجەمیان بەگوێرەی قەبارەی زیانەکانیان قەرەبوو دەکرێنەوە.
جێگری پارێزگاری سلێمانی ئاماژەی بەوە کرد، ''خەمڵاندنی زیانی بەشێک لە دووکانەکان دواکەوتبوو کە ئەمڕۆ بۆ ئەوانیش خەمڵاندنیان بۆ کرا، بۆیە رۆژی دووشەممە دیاریکراوە بۆ ئەوەی سەرجەم ئەو خۆشەویستانە قەرەبووەکانیان وەربگرنەوە.''
ئاگرکەوتەنەوەکە بەرەبەیانیی رۆژی شەممە 5ـی نیسان، لە بەشێکی دووکانەکانی بازاڕی دارەسووتاوەکەی سلێمانی روویدا و، زیاتر لە یەک ملیار دینار زیانی لێکەوتووەتەوە.
تاوەکو ئێستا کەسێک لەسەر رووداوەکە دەستبەسەرە. سەرکەوت ئەحمەد، گوتەبێژی پۆلیسی سلێمانی بە رووداوی گوت ''شەوی پێش ئاگرەکە، کەسێک لەنێو بازاڕی دارەسووتاوەکە کە خۆی لەوێ کاسبکارە، سەرقاڵی لەحیمکردن بووە، بە تۆمەتی ئەوەی هۆکاری ئاگرەکە بێت، دەستبەسەر کراوە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ