رووداو دیجیتاڵ
پارێزگای هەولێر کردنەوەی توونێلی پیرمامی بۆ بارهەڵگر راگەیاند "بەڵام لە رۆژانی هەینی و بۆنە و پشووەکان، هاتووچۆیان رێگەپێدراو نییە."
پارێزگای هەولێر لە راگەیێندراوێکدا کە ئەمڕۆ (شەممە، 11-05-2024) بڵاویکردەوە، رایگەیاند لەپێناو بەرژەوەندیى گشتیی و جموجۆڵ و جووڵەی بازرگانی و کەمکردنەوەی ئاستەنگى هاتووچۆ، بڕیاردرا بە کردنەوەی توونێلی پیرمام بە رووی هاتووچۆی بارهەڵگرەکان بە پابەندبوونیان بە کێشی رێگەپێدراو و بارنەکردنى کێشی زیادە.
لە راگەیێندراوەکەدا هاتووە، ئێستا زۆربەی رێگە سەرەکییەکان بە رووی هاتووچۆکردنیان داخراوە و بەشێک لە رێگە جێگرەوەکانیش گونجاونین.
ئەو بڕیارە تاوەکو ئەوکاتەیە، کە رێگەی گونجاو بۆ بارهەڵگرەکان دابین دەکرێت. "لە رۆژانی هەینی بۆ ماوەی 24 کاژێر ناتوانن بە توونێلی پیرمام هاتووچۆ بکەن، لە بۆنە و پشووەکانیشدا رێگە پێدراونین."
رۆژی 28-04-2024، راگەیاندنی هاتووچۆی هەولێر رایگەیاند، لەبەر بەرژەوەندیی گشتی و لەپێناو پاراستنی سەلامەتی شوفێران، لە کاژێر 8:00ـی رۆژی دووشەممەوە هاتووچۆی بارهەڵگر لە توونێلی پیرمام رادەگیرێت.
رێگەکانی بەستۆرە، بەربیان، شێخ توراب، مەکردان و جووت سایدی باسرمە، وەکو جێگرەوە دیاریکرابوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ