هەڵەیەک روویدا! دووبارە هەوڵبدە
ئەو عەرەبانەی لە پەلکانە خێوەتیان هەڵداوە، عەرەبی هاوردەن
رووداو دیجیتاڵ
تادێ هێزی زیاتری سوپای عێراق لە گوندی پەلکانە جێگیر دەکرێ. پشتیوان بەو هێزە، عەرەبی هاوردە خێوەتیان هەڵداوە و دژی کوردی گوندەکە گردبوونەتەوە.
تیمی رووداو چوونە نێو خێوەتەکەی عەرەبەکان، ژمارەیان 40 بۆ 50 کەسە و بەشێکیان نووسراو و گرێبەستیان بەدەستەوەیە، دەڵێن "ئێمە، خەڵکی رەسەنی پەلکانەین و تاوەکو مافەکانمان وەرنەگرینەوە رێگە بە درووێنەکردن نادەین."
جەبار عەباس، عەرەبی پەلکانە دەڵێت "کورد برای ئێمە و ئەگەر مافیان هەیە با بیبەنەوە. ئێمە، داوا لە دادگەی فیدراڵی و سەرۆکوەزیرانی عێراق دەکەین کێشەکەمان بۆ چارەسەر بکەن، ئەگینا کێشەی عەشاریری لەنێوانمان دروست دەبێت و کێشەکە گەورە دەبێت، ئەگەر فەرمانی دروێنەکردنیش هەبێت، قبوڵ ناکەین و ناهێڵین دروێنە بکرێت."
لە زۆربەی ناوچەکانی کەرکووک، خەڵک بۆ پشتیوانیکردنیان چوونەتە دیوەخانی کەسایەتیێکی کوردی پەلکانە.
کورد لە سنووری سەرگەڕان، کە ژمارەیان زیاتر لە 10 گوندە، تاپۆی زەوییەکانیان هەیە و ئامادە نین دەستبەرداری بن.
محەممەد ئیسماعیل، نوێنەری جووتیارانی پەلکانە دەڵێت "هەموو ئەو نووسراوانەی لەلای ئەوانە (عەرەبە هاوردەکان) ساختەیە. من، بەڵگەم لایە ئەو گرێبەستانەیان بە ساختە کردووە و قەرەبووی ماددەی 140ـیان وەرگرتووە. ئەوان دەڵێن ئەگەر حکومەتیش بڕیار بدات رێگە نادەین دروێنە بکەن."
هەروەها گوتی "ئێمە دەڵێن تەنیا سوپا و هێزە ئەمنییەکان بکشێننەوە، ئەوەی دیکە بۆ خۆمان جێبهێڵن، ئەوان داگیرکەرن و ئێمە بە پێنج خولەک دەریاندەکەین لێرە."
بەپێی بەڵگەنامەکانی نووسینگەی کەرکووکی ماددەی 140، ئەو عەرەبانەی لە پەلکانە خێوەتیان هەڵداوە، عەرەبی هاوردەن و قەرەبووی ماددەی 140ـیان وەرگرتووە، بەڵام دەیانەوێت پشتئەستوور بە هێزە عێراقییەکان بێنەوە گوندەکە و لەسەر زەویی کورد، کشتوکاڵ بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ