کوردستان
خۆڵبارین و بارانبارین لە دوو کات و شوێنی جیاوازی هەرێمی کوردستان. وێنە: بڵند تاهیر - رووداو
رووداو دیجیتاڵ
کەشناسیی هەرێمی کوردستان دەڵێت، پێشبینی دەکرێت سبەی لە چەند ناوچەیەک باران ببارێت و لە چەند ناوچەیەکیش تۆز و خۆڵ بێت.
ئەمڕۆ یەکشەممە، کەشناسیی هەرێمی کوردستان بڵاویکردەوە، ئەمڕۆ ئاسمان ساماڵ و پەڵەهەور دەبێت و پلەی گەرما نزیک دەبێتەوە لە دوێنێ.
لەبارەی کەشوهەوای سبەینێوە، کەشناسی رایگەیاند، "لە ئەنجامى دروستبوونى ناجێگیرییەک، ئەگەرى تاوەباران لە بەشێک لە ناوچە شاخاوییەکان هەیە. هەندێک جار نمەباران و هەورەبرووسکە دەبێت."
کەشناسی ئاماژەی بەوەش کردووە، "بەهۆی خێرایی باوە، سبەی بەرزبوونەوەی تۆز و خۆڵ و بارانبارین هەیە، بەتایبەت لە سنوورى ناوچە شاخاوییەکانى پارێزگاکانى دهۆک و سلێمانى."
محەممەد کەمال، شارەزای کەشناسی، ئەمڕۆ بە تۆڕی میدیایی رووداوی گوت، "سبەی دوای نیوەڕۆ بۆ ماوەیەکی کورت لە ناوچە شاخاوییەکانی سلێمانی، دهۆک، هەڵەبجە، ئیدارەکانی راپەڕین و سۆران ئەگەری بارانبارین هەیە."
ئەو کەشناسە گوتیشی، "هەر سبەی لە باشووری هەولێر، باشووری کەرکووک و باشووری گەرمیان ئەگەری خۆڵبارین هەیە. خۆڵبارینەکە ناوبەناو تاوەکو 15ی ئەم مانگە بەردەوام دەبێت، هەندێک جار زۆر کەم دەبێت و هەندێک جار مامناوەند."
بەگوێرەی کەشناسیی هەرێمی کوردستان، سبەی بەراورد بە ئەمڕۆ، پلەی گەرما 2 بۆ 5 پلە نزم دەبێتەوە و بەم شێوەیە دەبێت:
هەولێر: 32 پلەی سیلیزی
سلێمانی: 30 پلەی سیلیزی
دهۆک: 30 پلەی سیلیزی
کەرکووک: 34 پلەی سیلیزی
زاخۆ: 31 پلەی سیلیزی
هەڵەبجە: 30 پلەی سیلیزی
سۆران: 29 پلەی سیلیزی
حاجی ئۆمەران: 19 پلەی سیلیزی
گەرمیان: 36 پلەی سیلیزی
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ