رووداو دیجیتاڵ
لە ئیلامی رۆژهەڵاتی کوردستان، بە هەوڵی چالاکڤانانی بوارەکە، ناوەندێک بۆ زمان و ئەدەبیاتی کوردی کرایەوە.
ناوەندەکە بە ناوی "دەبیرخانەی زمان و ئەدەبیاتی کوردی ئیلامی" کراوەتەوە و بەگوتەی بەڕێوەبەرانی، ئامانجی برەودان، بڵاوکردنەوە، زیندووڕاگرتن و واتادارکردنی زمانی کوردی ئیلامی و زمانی دایکە.
بەڵام هەندێ لە نووسەرانی ئیلام پێی گەشبین نین.
دەبیرخانەی زمان و ئەدەبیاتی کوردی ئیلامی سەر بە بەڕێوەبەرایەتی کولتوور و ئیرشادی پارێزگای ئیلام دەبێت و رۆژی 13-03-2024 کرایەوە، چوارچێوەی چالاکییەکانیشی تەنیا پارێزگای ئیلام دەبێت.
عەلی هوشمەند، بەڕێوەبەری کولتوور و ئیرشادی پارێزگای ئیلام، لە کاتی کردنەوەی دەبیرخانەکەدا گوتی، "ئەم دەبیرخانەیە لە بواری توێژینەوە و هەروەها چاپکردن و پشتگیری لە بەرهەمەکاندا چالاک دەبێت و گرنگیی بە بواری کولتووری خۆجێی و بەهێزکردنی شوناسی نیشتمانیی ئێرانی ئیسلامی دەدات.
عەلی هوشمەند گوتوویەتی، "حکومەتی سێزدەیەم (حکومەتی ئیبراهیم رەئیسی) پابەندی بەڵێنەکانی خۆیەتی و گرنگیی بە کولتووری گەلان دەدات و هەر لەم چوارچێوەیەشدا ئەم دەبیرخانەیەی لە ئیلام کردووەتەوە.
بەڵام نووسەرانی خەڵکی ئیلام دەڵێن، چوار ساڵ لەمەوبەر و لە سەردەمی حکومەتی حەسەن رووحانیدا بڕیاردرا ناوەندێکی لەمجۆرە لە ئیلامدا دروست بکرێت و ئەو کاتیش هەموو کارەکانی تەواو کرابوون.
ئاکۆ حوسێنپوور، نووسەری خەڵکی ئیلام و خاوەن ئیمتیازی چاپەمەنی "ژ" دەڵێت، "سەرەڕای هەموو ئەو رەخنانەی لەسەر رەوتی دامەزرانی ئەم دامەزراوەیە هەیە، بەهۆی ئەوەی بەرپرسایەتییەکەی بە کەسانی دڵسۆز سپێردراوە، بێگومان بەرهەمی گەورە و پیرۆزی دەبێت".
بەڵام نووسەرێکی خەڵکی ئیلام رەخنە لە تابلۆی دەبیرخانەکە دەگرێت کە تێیدا کوردی بە "کردی" نوسراوە و دەڵێت، "هەر بەمەدا دیارە تەنیا بۆ پڕوپاگەندەیە".
ئەو نووسەرە ئیلامییە هەروەها دەڵێت، "تەواوی فێستیڤاڵە کوردییەکان لە ئیلام داخراون، وەکو مناڵ، رازان و...، لە شارێکدا کە رێگە نادەن یەک رستەی وەک "گیان و هەناسەم بەڕوو" لەسەر دیوارێک بنووسرێت، ئێستا چۆن رێگە دەدەن لەسەر زمانی کوردی ئەم ناوچەیە کار بکرێت؟".
زاهیر سارایی، نووسەری خەڵکی ئیلام و یەکێک لە بەڕێوەبەرانی ئەو ناوەندە، دەڵێت، "هەستمان کردووە ئیرادە و خواستێکی بەهێزی لە پشتە و نیشانەشی ئەوەیە بەڵێن دراوە دەسەڵات و ئیمکاناتی باشی بۆ دابین بکەن".
زاهید سارایی لە لاپەڕەی ئینستاگرامی خۆیدا نووسیوویەتی، "زمان و ئەدەبیاتی ئیلامی کە لە ناوی دامەزراوەکەیە بە مانای زمان و وێژەی کوردی لە هەموو پارێزگای ئیلام دایە و سنووردار نەکرێت بە شارێک یان بە زاراوەیەک، بە واتایەکی دیکە ناوی دەبیرخانەکە هەموو زاراوەکانی ئیلام لەخۆ دەگرێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ