هەڵەیەک روویدا! دووبارە هەوڵبدە
رووداو دیجیتاڵ
قائیمقامیەتی کەرکووک و وەزارەتی دارایی عێراق لە کەرکوک داوای چۆڵکردنی سێ گەڕەک و ناوچە دەکەن و بڕیارە لە شوێنیاندا چەند پرۆژەیەکی وەبەرهێنان دروست بکرێن و خاوەنی ئەو خانووانەش داوای قەربوو دەکەن.
بە گوێرەی زانیارییەکانی پەیامنێری رووداو لە کەرکووک، داوا لە دانیشتووانی گەڕەکەکانی سەرچنار، گۆڕەپانی ئاهەنگەکان و ئینزباتخانەی کۆن کراوە لە ماوەی هەفتەیەکدا خانووەکانیان چۆڵ بکەن، ئێستا ماوەکەیان بۆ مانگێک درێژکراوەتەوە.
دانیشتووانی ئەو گەڕەک و ناوچانە لەدوای ساڵی 2003ـوە بە شێوەی زێدەڕۆیی لەو ناوچانە خانوویان دروست کردووە.
بەپێی زانیارییەکانی رووداو داوای چۆڵکردنی ناوچەی ئینزباتخانەی کۆن کە 50 ماڵی تێدایە لە کورد و عەرەب و تورکمان لەسەر داوای وەزارەتی دارایی عێراق بووە، نەک قائیمقامیەتی کەرکووک. بڕیارە پرۆژەیەکی گەورەی وەبەرهێنان لەسەر رووبەری ئەو زەوییەی ناوچەی ئینزباتخانەی کۆن دروست بکرێت.
هەرچی گەڕەکەکانی سەرچنار و گۆڕەپانی ئاهەنگەکانن لەلایەن قائیمقامیەتی کەرکووکەوە داوا لە دانیشتووانەکەیان کراوە خانووەکان چۆڵ بکەن و بڕووخێنرێن.
دانیشتوانی ئەو گەڕەک و ناوچانەش داوا دەکەن قەرەبوو بکرێنەوە، چونکە ئەوان لەبەر هەژاری لەو ناوچانە نیشتەجێن و بەم کاتەش هیچ شوێنێک نییە بۆی بچن.
بە گوتەی پەیامنێری رووداو، دوێنێ هەوڵێک هەبووە بۆ ئەوەی لە چوارچێوەی ئەو 10 هەزار پارچە زەوییەی بڕیارە بەسەر کەسوکاری شەهیدانی شەڕی داعش و زیانلێکەوتووانی ئەو شەڕەدا دابەشبکرێت، بەشێک لە زەوییەکان بۆ قەربووکردنەوەی دانیشتووانی ئەو گەڕەکانە دەستنیشان بکرێت؛ ئەوانەی کە زۆر پێویستیان پێیەتی، بە مەرجێک خەڵکی کەرکووک بن. بۆ ئەو مەبەستەش رەزامەندی پیشاندراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ