رووداو دیجیتاڵ
ئێوارەی رۆژی شەممە 11-09-2021 لەنێو بازاڕی قەزای خەبات بەهۆی شەڕی نێوان دوو بنەماڵەوە چوار کەس کوژران. دواتریش یەکێک لە بریندارەکان گیانی لەدەستدا. دوێنێ شەویش لایەنێکی شەڕەکە دەستی بۆ چەک بردووەتەوە و تاوەکو بەرەبەیان دەنگی تەقە لەو قەزایە دەبیسترا.
شەڕەکە چۆن روویدا؟
مێردمنداڵێکی تەمەن لەنێوان 13 بۆ 14 ساڵ دەچێتە چێشتخانەیەک و داوای لەفەیەک دەکات، بەگوتەی منداڵەکە کە دواتر بۆ کەسوکارەکەی باسکردووە، خاوەن چێشتخانەکە و شاگردەکانی گاڵتەیان پێکردووە و لەفەکەیان پێنەداوە و لێیانداوە. مێرد منداڵەکە دەچێتەوە بۆ ماڵەوە و کە لێیان پرسیوە بۆ واتلێهاتووە ئەویش باسی رووداوەکەی کردووە و دواتر بۆ چارەسەر بردوویانەتە نەخۆشخانە.
براگەورەی مێردمنداڵەکە تەلەفۆن بۆ خاوەن چێشتخانەکە دەکات و داوای لێدەکات تاوەکو باوکی نەگەڕاوەتەوە ماڵەوە و کێشەکە گەورەتر نەبووە بە ئاسانی چارەسەر بکرێت، بچنە ماڵیان و داوای لێبووردن بکەن، بەڵام بەگوتەی ئەو خێزانە خاوەن چێشتخانە و شاگردەکانی زۆر گوێیان بە قسەکەیان نەداوە و داواکەیان رەتکراوەتەوە.
کاتێک باوکی میردمنداڵەکە دەگەڕێتەوە بۆ ماڵەوە و بە رووداوەکە دەزانێت دەچێتە چێشتخانەکە و دەبێتە دەمەقاڵێ لەنێوان ئەو و خاوەن چێشتخانەکە و شەڕە تەقە دروستبووە. لە ئەنجامدا باوکی مێردمنداڵەکە بریندارە و یەکێک لە کوڕەکانیشی کوژراوە، لە لایەنی بەرامبەر کە خاوەنی چێشتخانەکەیە سێ کەسیان کوژراوە و یەکێکیشیان بریندارە.
شەوی 15-9-2021 چی روویدا؟
ئێوارەی رۆژی چوارشەممە 15-9-2021 تەقەکردن لە قەزای خەبات دستیپێکرد و تاوەکو درەنگانێکی شەو بەردەوام بوو. ئەگەرچی دەگوترا شەڕ روویداوەتەوە لەنێوان دوو بنەماڵەکە و کوژرا و بریندار هەیە، بەڵام پەیامنێری رووداو لە قەزای خەباتەوە گوتی، نە کەس بریندار بووە و نە کەسیش کوژراوە.
فەرهاد دۆڵەمەڕی، پەیامنێری رووداو کە بۆ وەرگرتنی زانیاریی چووبووە قەزات خەبات گوتی، لەگەڵ لایەنە ئەمنییەکان و قایمقامی خەباتیش قسەیکردووە و زانیاریی دەستکەوتووە کە شەڕەکە تەنیا تەقەکردن بە ئاسماندا بووە و هیچ زیانێکی نەبووە.
پەیامنێری رووداو گوتی دوو لایەنی شەڕەکە دوورن لەیەک، دوێنێ شەو لایەنێکیان لە ماڵی خۆیانەوە تەقەی هەواییان کردووە و هیچ شەڕێک و رووبەڕووبوونەوەیەک لەنێوانیاندا رووینەداوە. دواتر پۆلیس و ئاسایش توانیان دۆخەکە کۆنترۆڵبکەن و لەکاژێر 00:00 تەقەکردنەکەش کۆتاییهات و دۆخی خەبات بە تەواوی ئاسایی بووەوە.
پارێزگاری هەولێر: شەڕەکە شەڕی دوو عەشیرەت نییە و تەنیا شەڕی دوو بنەماڵەیە
ئومێد خۆشناو، پارێزگاری هەولێر لەبارەی دۆخی دوێنی شەوی قەزای خەبات بە تۆڕی میدیایی رووداوی راگەیاند، لە شەڕەکەدا هیچ زیانێکی گیانی نەکەوتووەتەوە و تەقەکان بە ئاسماندا کراون و دەستبەجێ هێزێکی زۆری ئەمنی (ئاسایش، پێشمەرگەی زێرەڤانی و پۆلیس )مان رەوانەی شارۆچکەکە کرد و دۆخەکەیان کۆنترۆڵکرد.
ئومێد خۆشناو گوتی: "ئەو دۆسییەیە پەیوەندی بە عەشیرەتەکانی خەیلانی و گۆرانەوە نییە و تەنیا شەڕی نێوان دوو بنەماڵەیە".
لەبارەی دۆسییەکەوە پارێزگاری هەولێر ئاماژەی بەوەکرد، ئەو دۆسیەیە دەبێ یاسا یەکلایی بکاتەوە و تاوانبار بە سزای خۆی بگات، چەند تۆمەتبارێک دەستگیرکراون و هەرکەسێکی دیکەش تۆمەتی لەسەربێت دەستگیر دەکرێت و دادگا حوکمی خۆی دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ