ئەفسەرێک لەکاتی جێهێشتنی پۆستەکەی لەلایەن پێشمەرگە و ئەفسەرانەوە بە گریانەوە ماڵئاوایی لێ دەکرێت

 

 

گرتەیەکی ڤیدیۆیی ماڵئاوایی ئەفسەرێک کە پلەی رائیدی هەیە و لە هێزی تایبەتی یەکە لە لایەن هاوڕێ و کارمەندانییەوە دەنگدانەوەی لە سۆشیاڵ میدیا دروستکردووە، بەتایبەت کە دیمەنەکە جگە لە ماڵئاواییکردن بە بەخشینی گوڵ، گریانی پێشمەرگەکان بۆ رۆیشتنی ئەو ئەفسەرە و گواستنەوەکەی کاریگەرە.

 

لە گرتە ڤیدیۆییەکەدا نیگەرانی و گریانی پێشمەرگەکان بە روونی دەری دەخات کە بۆ رۆیشتنی ئەو بەرپرسەیان نیگەرانن و ئەویش جگە لە باوەش پێداکردنیان دەست لەسەر سنگ بۆیان دەوەستێت و دواتر قسەیان بۆ دەکات و دڵنەواییان دەداتەوە.

 

رائید بەختیار دۆڵەمەڕی کە ماوەی 29 ساڵ دەبێت پێشمەرگەیە و 16 ساڵە لەو شوێنەی دەوامی دەکرد کە دوێنێ بۆ ئەفسەرێکی دیکە بەناوی رائید ئەحمەد کەریم پۆستەکەی جێهێشت، رۆژی سێشەممە 17-10-2023 لەبارەی گرتە ڤیدیۆییەکەوە بە تۆڕی میدیایی رووداوی گوت، "پۆستەکەم رادەستی ئەو ئەفسەرە بەرێزە کرد، بەڵام دوای ئەوە نەمزانی کە پێشمەرگە و ئەفسەران ئەو سوپرایزەیان کرد. دەمێک بوو لەگەڵ ئەو بەڕێزانە پێکەوە بووین، بەڵام ئیدی من بە فەرمی گوێزرامەوە بۆ شوێنێکی دیکە. خۆشەویستی ئەو بەڕێزانە سەرمایەیە بۆ من."

 

 

لە گرتە ڤیدیۆییەکەدا بەشێک لە پێشمەرگە و ئەفسەران لە ریزدا دەردەکەون و بەهۆی کاریگەربوونیانەوە هەندێکیان ناتوانن ماڵئاواییەکە تەواو بکەن، جگە لەوەی بە چەپڵەڕێزان ماڵئاوایی لێدەکەن.