رووداو دیجیتاڵ
بە پێی ئەو زانیاری و گرتە ڤیدیۆییانەی لە شاری ورمێوە بە تۆڕی میدیایی رووداو گەیشتوون، زڕدایکێک لە کچێکی تەمەن 4 ساڵان دەدات و بە هۆیەوە زەبر بە مێشکی کچەکە گەیشتووە و لە بەشی چاودێری چڕی نەخۆشخانەیەکی شارەکە خەوێندراوە.
بە پێی گرتەیەکی ڤیدیۆیی کە لە کامێرای چاودێرییەوە تۆمارکراوە، پێش تێکچوونی تەندروستیی، زڕدایکی ئەو کچە لێی دەدات و لە بەرهەیوانی ماڵەکەیانەوە فڕێی دەداتە نێو حەوشەکەیان و دواتریش هەر بە لێدان و راکێشان دەیباتەوە ژوورەوە.
باوکی کچەکە خەڵکی ناوچەی کوتوولی سەر بە شاری خۆیە لە باکووری پارێزگای ورمێ. چەند ساڵە لە ورمێ نیشتەجێییە و لە هاوژینی یەکەمی جیا بووەتەوە. کوڕێک و کچێکی لە هاوژینی یەکەمی هەیە و زیاتر لە ساڵێکە ژیانی هاوژینی لەگەڵ ژنێکی دیکە پێکهێناوە.
باوکی کچەکە لە کارخانەیەک لە تەورێز کار دەکات و زۆربەی کاتەکان لە ماڵەوە نییە.
شەوی هەینی، 17-12-2023، کە دەنگی گریانی کچەکە بیستراوە، دراوسێکانیان پەیوەندییان بە باوکییەوە کردووە و ئەویش گەڕاوەتەوە و بینیویەتی کچەکەی تەندروستی تێکچووە و زڕدایکەکە نەیبردووەتە نەخۆشخانە.
دراوسێکانی ئەو ماڵە بە باوکی کچەکەیان گوتووە، چەند مانگێکە بە تایبەت شەوانە دەنگی گریانی کچ و کوڕەکە دەبیسترێت و زڕدایکیان ئازاریان دەدات.
بە پێی زانیارییەکان، دوای رووداوەکە، باوکی کچەکە سکاڵای دژی هاوژینەکەی تۆمارکردووە و پۆلیسی ورمێ زڕدایکی کچەکەی دەستبەسەر کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ