سەرۆک بارزانی لەبارەی دۆخی سووریا: هیوادارین بە زووترین كات ئەو شەڕ و ئاڵۆزییانە رابگیرێن

 

رۆژی یەکشەممە، 18ی کانوونی دووەمی 2026، بارەگای بارزانی پەیامی سەرۆک بارزانی بڵاوکردەوە. لەدوای کۆبوونەوەکەی دوێنێی سەرۆک بارزانی و تۆم باراک، نێردەی ئەمریکا بۆ سووریا لە پیرمام، ئەمە یەکەمین پەیامی سەرۆک بارزانییە.

 

سەرۆک بارزانی کۆبوونەوەکەی دوێنێیان لەگەڵ نێردەی ئەمریکا لە سووریا بە فەرماندەی گشتیی هەسەدە و سەرۆکی ئەنەکەسە بە "گرنگ" ناودەبات و دەڵێت: "هیوادارین هەموولایەك بۆ ئەو رێككەوتنانە بگەڕێنەوە كە پێشتر بۆ چارەسەركردنی كێشەكان و گەیشتن بە سەقامگیری لەنێوان لایەنەكانی سووریا بەستراون."

 

سەرۆک بارزانی مەرسوومەکەی ئەحمەد شەرع، سەرۆکی سووریا لەبارەی مافەکانی کورد بە "هەنگاوێکی ئەرێنی و ئاراستەی دروست" ناودەبات.

 

هەر لەوبارەیەوە سەرۆک بارزانی هیوا دەخوازێت ئەو هەنگاوە ببێتە "زەمینەیەک بە ڕەزامەندیی لایەنە پەیوەندیدارەکان دەوڵەمەند بکرێت و بە شێوەیەکی یاسایی و دەستووری، گەرەنتیی مافەكانی گەلی كوردی لەسەر بنیات بنرێت."

 

هەروەها دەرچوونی مەرسوومی سەرۆكی سووریا لەبارەی مافەكانی كورد بە هەنگاوێكی ئیجابی و ئاراستەی دروست دەزانین و  هیوادارین ببێتە زەمینەیەك بۆ ئەوەی بە ڕەزامەندیی لایەنە پەیوەندیدارەکان دەوڵەمەند بکرێت و بە شێوەیەکی یاسایی و دەستوری، گەرەنتیی مافەكانی گەلی كوردی لەسەر بنیات بنرێت.

 

 

پەیامێک لە سەرۆک بارزانییەوە

 

بەناوی خودای مەزن و دلۆڤان

 

سەبارەت بە دوایین پەرەسەندن و گۆڕانكارییەكانی سووریا و لە چوارچێوەی هەوڵدان بۆ چارەسەركردنی كێشەكان، دوێنێ كۆبوونەوەیەكی هاوبەشی گرنگمان لەگەڵ نێردەی تایبەتی سەرۆك ترامپ بۆ كاروباری سووریا و فەرماندەی گشتیی هێزەكانی سووریای دیموكرات و سەرۆكی ئەنەكەسە هەبوو.

 

هیوادارین بە زووترین كات ئەو شەڕ و ئاڵۆزی و گرژییانە ڕابگیرێن كە ئێستا لەنێوان هێزەكانی حكوومەتی سووریا و هێزەكانی سووریای دیموكرات لە ئارادایە و هەموو لایەك بۆ ئەو ڕێككەوتنانە بگەڕێنەوە كە پێشتر بۆ چارەسەركردنی كێشەكان و گەییشتن بە سەقامگیری لەنێوان لایەنەكانی سووریا بەستراون. هەروەها دەرچوونی مەرسوومی سەرۆكی سووریا لەبارەی مافەكانی كورد بە هەنگاوێكی ئیجابی و ئاراستەی دروست دەزانین و  هیوادارین ببێتە زەمینەیەك بۆ ئەوەی بە ڕەزامەندیی لایەنە پەیوەندیدارەکان دەوڵەمەند بکرێت و بە شێوەیەکی یاسایی و دەستوری، گەرەنتیی مافەكانی گەلی كوردی لەسەر بنیات بنرێت.

 

مسعود بارزانی

18ی کانوونی دووەمی 2026