رووداو دیجیتاڵ
نزیکەی 20 سزادراو لە چاکسازیی گەورانی سلێمانی، کە تووشبووی نەخۆشیی ڤایرۆسیی جگەرن، داوا دەکەن لێخۆشبوونی تایبەتیان بۆ دەربکرێت. ئەوان دەڵێن، لە ماوەی رابردوودا لێخۆشبوون بۆ تووشبووانی شێرپەنجە دەرکراوە و "داواکارین ئێمەش لێخۆشبوونمان بۆ دەربکرێت".
(س.ق.ر)، سزادراوێکی تەمەن 42 ساڵە و سێ ساڵە لە چاکسازیی گەورانی سلێمانی لە زیندانە، بە رادیۆی رووداوی گوت: " نزیکەی 20 کەسین لە چاکسازیی گەورانی سلێمانی و هەموومان تووشبووی نەخۆشیی ڤایرۆسیی جگەرین. داواکارین لە سەرۆکایەتیی هەرێمی کوردستان و حکومەت لێخۆشبوونمان بۆ دەربکەن."
ئەو سزادراوە گوتی: "ئەو 20 کەسە هەموومان لە دوو هۆڵدا دانراوین. لە ماوەی رابردوودا لێخۆشبوونی تایبەت بۆ ئەو سزادراوانە دەرچوو کە نەخۆشیی شێرپەنجەیان هەبوو. ئێمەش داواکارین لێخۆشبوونی تایبەتمان بۆ دەربکرێت و بگەڕێینەوە نێو خێزانەکانمان."
ئەو سزادراوانە جۆری سزاکانیان جیاوازە، بە شێوەیەک لە ساڵێکەوە بۆ 25 ساڵی تێدایە.
(س.ق.ر) دەڵێت: "خۆم سزاکەم چوار ساڵە، ئێستا سێ ساڵم تەواوکردووە و نزیکەی ساڵێکم ماوە. هەروەها زۆرینەی سزادراوەکان کەمتر لە ساڵێکیان ماوە؛ بۆیە داواکارین لێخۆشبوونی تایبەتمان بۆ دەربکرێت، چونکە نەخۆشییەکەمان چارەسەری نییە و (دەمانەوێت) ئەو ماوەیەی لە ژیاندا ماوین، لەگەڵ خێزان و منداڵەکانمان بەسەری ببەین."
ئەو هاونیشتمانییە گوتیشی: "چەندین جار داواکارییان پێشکێشی بەڕێوەبەرایەتیی چاکسازیی گەورانی سلێمانی و بەڕێوەبەرایەتیی گشتیی چاکسازییەکانی هەرێمی کوردستان کردووە، بەڵام ئەوانیش چاوەڕێی ئەوەن لیژنەیەکی پسپۆڕ (تایبەتمەند) و تەندروستی لەلایەن حکومەت و سەرۆکایەتیی هەرێمی کوردستانەوە پێکبهێنرێت و سەردانمان بکات."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ