هەڵەیەک روویدا! دووبارە هەوڵبدە
کۆبوونەوەی مەسرور بارزانی و سەڵاحەدین بەهائەدین
رووداو دیجیتاڵ
سەلاحەدین بەهائەدین و مەسرور بارزانی لە هەولێر کۆبوونەوە؛ بۆ دەرچوون لە دۆخی چەقبەستووی هەرێمی کوردستان، یەکگرتووی ئیسلامیی کوردستان دەستپێشخەرییەکی بۆ پارتی و یەکێتی کردووە.
هۆشیار سیوەیلی، بەرپرسی پەیوەندییەکانی دەرەوەی پارتی دەڵێت، "من گەشبینم ئەو دەستپێشخەرییەی مامۆستا، ئاکام و ئەنجامێکی باشی لێبکەوێتەوە و هەرێمی کوردستان لەو دۆخە چەقبەستووەی تێیدایە رزگاری بێت، کە دۆخی چەقبەستوویی پێکنەهێنانی حکومەتی هەرێمی کوردستانە."
بەگوێرەی راگەیێندراوێکی حکومەت، کاراکردنەوەی پەرلەمان و دامەزراوە یاساییەکان تەوەری سەرەکیی کۆبوونەوەکەی ئەمڕۆی نێوان مەسرور بارزانی و سەلاحەدین بەهائەدین بوون.
دەستپێشخەرییەکەی یەکگرتوو سێ تەوەری سەرەکی لەخۆ دەگرێت کە یەکێکیان راگرتنی هێرشی راگەیاندن و رەخساندنی زەوینەی گفتوگۆیە.
دوێنێ ئەمینداری گشتی یەکگرتوو بۆ هەمان مەبەست لە دەباشان لەگەڵ بافڵ تاڵەبانی، سەرۆکی یەکێتی کۆبووەوە.
رووداو زانیویەتی، بافڵ تاڵەبانی، بڕگەی یەکەمی دەستپێشخەرییەکەی قبووڵ کردووە و دەستبەجێ فەرمانی کردووە هەڵمەتی راگەیاندن لە دژی پارتی رابگیرێت.
سەلاحەدین بابەکر، گوتەبێژی یەکگرتووی ئیسلامیی کوردستان ئاماژە بەوە دەدات، "خشتەیەکی زەمەنیمان پێشکەش کردووە کە ماوەکەی مانگێکە؛ دەکرێت سەرەتا پەرلەمان کارا بکرێتەوە و دەستەی سەرۆکایەتیی هەڵبژێردرێت، دواتر هەنگاو بنرێت بۆ خاڵەکانی دیکە لە پێکهێنانی کابینەی نوێی حکومەت."
زیاتر لە ساڵ و نیوێک بەسەر هەڵبژاردنی پەرلەمانی کوردستاندا تێپەڕیوە، بەڵام تاوەکو ئێستا حکومەت پێکنەهاتووە و ئەم خولەی پەرلەمانیش تەنیا یەکجار کۆبووەتەوە.
لە دەستپێشخەرییەکەیدا یەکگرتوو داوای کردووە پەلە بکرێت لە کۆبوونەوەی پەرلەمان و پێکهێنانی حکومەت.
گوتەبێژی یەکگرتوو دەڵێت، هەریەک لە مەسرور بارزانی و بافڵ تاڵەبانی پێشوازییان لە دەستپێشخەریەکەیان کردووە.
ئێستا چاوەکان لەسەر ئەنجامی ئەم دەستپێشخەرییەی یەکگرتوون، کە ئایا دەرگا داخراوەکان دەکاتەوە، یان دۆخی سیاسیی هەروا بە چەقبەستوویی دەمێنێتەوە؟
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ