بەڕێوەبەری ناحیەی دارەتوو: باران زیانی نەبوو

 

 

رۆژی دووشەممە 20-11-2023، ئاکام ئازاد، دانیشتووی دارەتووی نوێ، لە بەرنامەی بەرپرسیاری تۆڕی میدیایی رووداو کە رێبوار عەلی پێشکێشی دەکات، گلەیی لە "وەڵامنەدانەوە"ـی داواکانیان لەبارەی ئاستەنگییەکانی دروستکردنی خەندەق لەبەردەم ماڵیان دەربڕی و گوتی، بەهۆی خەندەقەکەوە ناتوانم بچمە دەوام. کارەبا و ئاویان لەسەر بڕیوین گوایە بۆ ئاوی باران دروستکراوە، بەڵام هیچ ئاوێکی پێدا ناڕوات. لەنێو قوڕ و لیتە بەسەر دارێک بە ترسەوە دەپەڕینەوە".

 

ئەحمەد نەبی، بەڕێوەبەری ناحیەی دارەتوو رایگەیاند، ئاگاداری بڕینی کارەبا و ئاوی ئەو ماڵانە نین، بەڵام لە بەیانییەوە کێشەی ئەو چوار ماڵە چارەسەر دەکەن.

 

ئەحمەد نەبی گوتی، "خەندەقەکە بە دیراسەت لێدراوە و بۆ پێشگرتنە لە لافاو کە نیوەی دانیشتووانی دارەتووی نوێ لە لافاو دەپارێزێت".

 

بە گوتەی ئاکام ئازاد، شارەوانیی دارەتوو داوای پەنجەمۆری لە دانیشتووانی نزیک ئەو خەندەقە کردووە بۆ ئەوەی لە ئەگەری هەر رووداوێکی نەخوازراو، خۆیان بەرپرسیارێتی هەڵبگرن، بەڵام بەڕێوەبەری ناحیەی دارەتوو دەڵێت، ئاگاداری ئەو بابەتە نین.

 

ئەحمەد نەبی گوتی، "ئەو گەڕەکە تاوەکو ئێستا خزمەتگوزاری پێنەگەیشتووە. ئەو خەندەقە خەرجییەکی زۆری لێکراوە و ئاوی زیادە دەچێتە نێو خەندەقەکە. بەڕێوەبەری کارەبام راسپاردووە چارەسەریی کێشەی کارەبا بکەن. دەبێت ئاوەڕۆی سندووقی دروستبکرێت و لە هەوڵداین دیراسەی بابەتەکە بکەین و بودجەی بۆ تەرخان بکرێت".

 

وەک بەڕێوەبەری ناحیەی دارەتوو ئاماژەی بۆ دەکات، بارانبارینی دوو رۆژی رابردوو هیچ زیانی بە خەڵکی دارەتوو نەگەیاندووە و گوتی، "رێڕەوی سرووشتیی لە باغەمرە شەهابەوە دێت بۆ گەڕەکی رۆشنبیری، رێڕەوێکی زۆر گەورەیە و پاککراوەتەوە. خەندەقی دارەتووی نوێ لێدراوە و کارەکانی تەواو نەبووە. ئاوەڕۆی زۆر دروستکراون. سەرە مەنهۆڵەکان پاککراونەتەوە. چوار پرد دروستکراون. مەترسیی ساڵانی پێشوو نەماوە. پڕۆژەیەکی زۆر گەورە لە سەرووی دارەتوو بە گوژمەی 800 ملیار دینار لە قۆناخی جێبەجێکردندایە و رێڕەوی ئاو دەباتەوە نێو رێڕەوە سرووشتییەکان".