رووداو دیجیتاڵ
بەڕێوەبەری گشتیی بەڕێوەبەرایەتیی ئاوی پاریزگای سنە دەڵێت، بەنداوەکانی ئەو پارێزگایە تەنیا 38%ی ئاوەکەیان تێدا تێدا ماوە، ئاستی ئاوی بەنداوەکانی پارێزگاکە بەراورد بە ماوەی هاوشێوەی ساڵی رابردوو 25% کەمبووەتەوە.
ئەمڕۆ هەینی، 21ی تشرینی دووەمی 2025، ئارش ئاریانەژاد، بەڕێوەبەری گشتیی بەڕێوەبەرایەتیی ئاوی پارێزگای سنە بە میدیای فەرمیی ئێرانی رایگەیاند، بە لەبەرچاوگرتنی پێشبینییەکانی بەڕێوەبەرایەتیی کەشناسی و رێژەی کەمی بارانبارین لە پاییزی ئەم ساڵ، دۆخەکە ئاسایی نییە و وشکەساڵی لە پارێزگاکە بەردەوامە.
بە گوتەی ئاریانەژاد، دابینکردنی ئاوی خواردنەوە بۆ دانیشتووانی پارێزگاکە کاری لەپێشینەیانە و جەختی کردەوە، بۆ چارەسەرکردنی کێشەی کەمئاوی لە شاری بانە، ماوەی سێ مانگە دەست بە جێبەجێکردنی پرۆژەی گواستنەوەی ئاوی بەنداوی چراوەیسی سەقز بۆ بانە کراوە و کارکردن لە پرۆژەکەدا بەبێ وەستان بەردەوامە.
بەڕێوەبەری گشتیی بەڕێوەبەرایەتیی ئاوی پارێزگای سنە ئاماژەی بە کێشەی کەمئاوی لە شارەکانی دێولان و قوروە کرد و گوتی، کێشەی کەمئاوی لە شاری دێولان بە پرۆژەی گواستنەوەی ئاوی بەنداوی "قوچم" بۆ شارەکە چارەسەر کراوە، بەڵام بۆ شاری قوروە پیوێستیان بە زیاتر لە سێ تریلیۆن تمەنە و تاوەکو ئێستا دابین نەکراوە.
لە پارێزگای سنە 18 بەنداوی گەورە و بچووک هەن؛ دەسەڵاتی بەکارهێنانی 12 بەنداویان لە دەستی بەڕێوەبەرایەتیی ئاوی سنەیە و دەسەڵاتی بەکارهێنانی ئاوی 6 بەنداویش لە دەست بەڕێوەبەرایەتییەکانی ئاوی پارێزگاکانی کرماشان و ورمێ دایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ