دڵشاد شەهاب لەبارەی رۆژئاڤا: ئەمریکییەکان پشتیوانیی درێژکردنەوەی ئاگربەست دەکەن

 

 

دڵشاد شەهاب: ئێوارەتان باش، پێموایە بەر لەوەی کە باسی نێوەرۆکی کۆبوونەوەکە بکەم، ئەگەر دەرفەت هەبێ تۆزێک بگەڕێینەوە پێشتر و ئەو هەوڵانەی کە لە هەرێمی کوردستان هەبوون بۆ چارەسەرکردنی گرفتەکان یان خۆ بە خاوەنزانینی گرفتی برایانی ئێمە لە رۆژئاوای کوردستان. هەر لەو گرنگیدانەی کە جەنابی سەرۆک بارزانی بۆ ئەو پرسەی هەبووە، پەیوەندیی بەردەوامی لەگەڵ لایەنە پەیوەندیدارەکان و بەتایبەتیش لەگەڵ بەڕێز مەزڵووم عەبدی و، لەگەڵ هەموو لایەنەکانی دیکە هاریکار بوو بۆ چارەسەرکردنی ئەم پرسە و هەروەها هەوڵ و کۆششەکانی جەنابی سەرۆکی هەرێمی کوردستان لە دوای پڕۆسەی ئازادیی سووریا، دوای ئەوەی کە رژێمی پێشووی سووریا رووخا و حوکمێکی نوێ هاتە ئاراوە لە وڵاتەکە، کاری لەپێشینەی جەنابی سەرۆکی هەرێمی کوردستان ئەوە بووە کە ئەم پرسە بە هەموو شێوەیەک پەیوەندیدارە بە هەرێمی کوردستانەوە و رەنگدانەوەی بەسەر دۆخی ناوچەکەوە بە شێوەیەکی گشتی هەیە، بۆیە سەقامگیری و چارەسەرکردنی گرفتەکانی ئەوێ (سووریا و رۆژئاوای کوردستان) رەنگدانەوەی ئەرێنی بەسەر ناوچەکەوە دەبێ. هەوڵی بەردەوامی جەنابی سەرۆکی هەرێمی کوردستان و هەروەها پرسی مافەکانی برایانی ئێمە لە رۆژئاوای کوردستان و دابینکردنی ماف و شایستەکانی هەموو پێکهاتەکانی سووریا، بۆ ئەوەی کە وڵاتێکی سەقامگیر و سیستمێکی جێگیر و بێکێشەی هەبێ، [گرنگە و] بێگومان رەنگدانەوەی بەسەر دۆخی ئێمەشەوە دەبێ. 

 

لەو روانگەیەوە لە رابردوودا بەردەوام جەنابی سەرۆکی هەرێمی کوردستان لەگەڵ لایەنەکانی ئەمریکی لە پەیوەندیدا بووە، ئەوە جگە لە پەیوەندییە تەلەفۆنییەکان و هەموو کەناڵەکانی دیکەی دیپلۆماسی لەگەڵ ئەمریکا و دوا دیدار لەگەڵ بەڕێز تۆم باراک (نوێنەری ئەمریکا بۆ کاروباری سووریا) کە دیدارێکی تێروتەسەل بوو و کاتێکی زۆری خایاند و زۆر بە وردەکارییەوە باس لە هەموو گرفتەکان کرا، هەروەها باس لە دیدگای هەرێمی کوردستان کرا بۆ چارەسەرەکان.

 

بەر لەوەی باسی دیدارەکەی ئەمڕۆ بکەین، دۆخێک هەیە کە ئێمە لە ئەنجامی ئەم دیدارانەدا هەستی پێدەکەین کە بەڕاستی کاریگەری بەسەر دۆخەکەوە جێدەهێڵێت، ئەویش ئەوەیە کە زۆر جاران رێککەوتنیش لەسەر هەندێک شت هەیە یان ئەوەندەی کە ئامادەکاری هەیە بۆ هێورکردنەوە، ئەوەندەش رەنگە هەبوونی هەندێک هێز کە زۆر جاران لە دەرەوەی ئەو چوارچێوەیەی کە پلانی بۆ دادەنرێت لێرە و لەوێ کاریگەری جێدەهێڵن و دەبێتە هۆکاری بەریەککەوتن. زۆرێکیش لەو بەریەککەوتنانەی کە لەم رۆژانەدا روویانداوە، لەوانەیە بەشێک بن لەو شتە لۆکاڵییانەی کە نەبەستراونەتەوە بە بڕیاری ناوەندییەوە، چونکە ئێمە هەست دەکەین لە نێوەندگیری و پەیوەندییەکان کە لەگەڵ دەوڵەتی سووریا و برایانمان لە رۆژئاوای کوردستان هەیە، بڕیاری شەڕکردن بە هیچ شێوەیەک نییە و هیچیان رێگەی سەربازی بە رێگەیەکی گونجاو نابینن.

 

ئەو دیدارەی ئەمڕۆ کە بەڕێز باراک لەگەڵ بەڕێز مەزڵووم عەبدیش لە هەولێر بەڕێوەچوو، ئەو دیدارە کە وەک لە هەواڵەکەی ئێوەشدا هاتبوو، بەڕێزان مەزڵووم عەبدی و ئیلهام ئەحمەد تێێدا ئامادە بوون. دوای ئەوە پەیوەندییەکی تەلەفۆنی لەنێوان جەنابی سەرۆکی هەرێمی کوردستان و بەڕێز باراک دروست بوو لەسەر ئەو پێشهاتە نوێیانەی کە هەن، کە دووبارە گرێدراوی کۆبوونەوەکە بوو.

 

ئینجا ئەگەر باسی کۆبوونەوەکەی ئەمڕۆ بکەین، بێگومان ئەم کۆبوونەوەیە دوای کۆبوونەوەی ئەو بەڕێزانە لەگەڵ تۆم باراک و دوای پەیوەندییە تەلەفۆنییەکەی جەنابی سەرۆکی هەرێمی کوردستانیش ]هاتە ئاراوە]. هەندێک شتی نوێی تێدا هەن، ئەویش ئەوەیە کە بێگومان سەرجەم ئەو رێککەوتنانەی کە لەنێوان حکومەتی دیمەشق و  برایانی ئێمە لە رۆژئاوای کوردستان هەن، چی ئەوانەی کە بە رێککەوتنی گشتی لەسەری رێککەوتوون و چی ئەوەی کە ناکۆکن لەسەری، هەروەها چی ئەوەی کە پێشووتر واژۆی لەسەر کراوە،  هەموو ئەوانە کۆمەڵێک هەنگاون لە چەند بوارێکدا. ئەگەر دەرفەت هەبێ بۆتان بە خێرایی دەخەمەڕوو.

 

بەشێکیان بابەتی سەربازییە و چارەکردنی ئەو گرفتانەن. بێگومان ئەو پێکدانانەی کە دروست بوون. راگرتنیان بڕیارێکی یەکلاکەرەوەیە و هەموو لایەک لەسەری کۆکن و ئەمریکا زۆر بە گەرمی پشتیوانی لە درێژکردنەوەی دەکات. داوکاریی جەنابی سەرۆکی هەرێمی کوردستان یەکەم لە بەڕێز تۆم باراک و لە رێگەی نێوەندگیرییەوە لە بەڕێز شەرع و هەروەها لەگەڵ برایانی ئێمەش ئەوەیە کە لە ژێر گوشاری ئاگربەستێکی کورت مەودا کە ماوەی دوو رۆژ و سێ رۆژ و چوار رۆژ بێ، هیچ گرفتێک چارەسەر نابێ. بۆیە جەنابی سەرۆکی هەرێمی کوردستان داوای کردووە کە ماوەی ئاگربەست درێژ بکرێتەوە و هەوڵ بدرێت هێزەکان لەو ماویەدا دوور بخرێنەوە، بۆ ئەوەی لەژێر گوشاری بەکارهێنان و هەڕەشەی چک و لێکەوتەکانی شەڕدا نە هیچ گفتوگۆیەک سەر دەگرێت و نە بڕیارێکی دروستیش دەدرێت. بێگومان تاوەکو ئێستا ئەمە بڕیارێکی پەسندکراوە لەلای هەمووان کە پێمان وایە ئەمە رێگە خۆش دەکات بۆ هەنگاوەکانی داهاتوو.

 

بۆ هەنگاوەکانی داهاتووش بەرەوپێشچوون هەیە. ئەویش ئەوەیە کە ئەو شێوەیەی کە ئیدارەی ئێمە (کورد)، واتا ناوچە کوردییەکان لەو شوێنانەی کە لە سووریا هەن، چۆن ئەو تایبەتمەندییانەیان بپارێزرێن. گرفتێکی ئەوتۆ لەسەر تێگەیشتن لەسەر ئەم بابەتە نییە و ئێمە بە هەموو توانایەکمانەوە پاڵپشتی لەوە دەکەین کە پاراستنی تایبەتمەندییەکانی گەلی کورد لە رۆژئاوای کوردستان دەبێتە هۆی ئەوەی سووریایەکی سەقامگیر بنیاتبنرێت.

 

بێگومان کۆمەڵێک ئیدارە هەن ئێستا کە سەر بە بەڕێوەبەرایەتیی خۆسەرن لە رۆژئاوای کوردستان، داواکاریی ئەوان ئەوەیە کە بە شێوەیەکی گونجاو رێککەوتنیان لەسەر بکرێت و ئەم ئیدارانە بە شێوەیەک بەردەوامی بە کارەکانیان بدەن و پەیوەندیی فەرمییان لەگەڵ دامەزراوەکانی دەوڵەتدا هەبێت، چونکە ناکرێ ئیدارەیەک بەبێ ئەوەی کە لەگەڵ ئیدارەکانی دەوڵەتدا [پەیوەندی هەبێ] بەڕێوەبچێت.