کوردستان
لۆگۆی پڕۆژەی رووناکی و دەستی کەسێک کە پارە دەدات، لەگەڵ ئەو کۆدەی پڕۆژەی رووناکی بۆ زانینی بڕی کارەبای مانگانە بەکاری خستووە
رووداو دیجیتاڵ
پڕۆژەی رووناکی، کۆدێکی چوار ژمارەیی کارا کرد، لەمەودوا بەشداربووانی پڕۆژەکە دەتوانن لەڕێگەی ئەو کۆدەوە بزانن مانگانە چەند پارەی کارەبایان بۆ هاتووەتەوە، یان ئێستا چەند کارەبایان بەکارهێناوە.
ئەو کۆدەی کارا کراوە (#1992*)ە، بەشداربووانی پڕۆژەی رووناکی ئەو کۆدە لێدەدەن و دوو بژاردەیان دەداتێ (1.بڕی پسوولە) و (2.بڕی بەکارهێنان) بە داگرتنی ژمارە یەک بڕی کارەبای بەکارهێنراو و تێچووەکەیت پێ دەڵێت. هەروەها بە داگرتنی ژمارە دوو بڕی بەکارهێنانی ئێستات لە ماوەی هەفتەیەک تاوەکو 10 رۆژ دەداتێ.
سەرچاوەیەک لە پڕۆژەی رووناکی بە رووداوی گوت، هاوبەشانی پڕۆژەی رووناکی گلەیی ئەوەیان دەکرد، کە درەنگ کورتەنامەی مۆبایلیان لە بارەی بەکارهێنانی کارەباوە پێدەگەیشت، یان درەنگ پسوولەیان بۆ دەهاتەوە، یاخود ناتوانن هەر کاتێک بیانەوێت سەیری پسوولەکەیان و بڕی بەکارهێنانی کارەبا بکەم، بۆیە ئەو کۆدەمان کارا کرد.
ئەو سەرچاوەیە ئاماژەی بە تایبەتمەندیی ئەو کۆدە کرد و گوتی: "لەڕێگەی ئەو خزمەتگوزارییەوە، ئەو کەسانەی خۆیان لە پڕۆژەی رووناکی تۆمار کردووە، بە بەکارهێنانی ئەم کۆدە دەتوانێت بڕی پسوولە و بڕی بەکارهێنانی ئێستای کارەباکەی بزانێت."
تشرینی دووەمی 2024، مەسرور بارزانی، سەرۆکی حکومەتی هەرێمی کوردستان، پڕۆژەی رووناکی راگەیاند بە مەبەستی گەیاندنی کارەبای 24 کاژێری بۆ سەرجەم ماڵ و شوێنە بازرگانییەکان تاوەکو کۆتایی ساڵی 2026. لە 14ـی ئایاریش، ئەنجوومەنی وەزیرانی حکومەتی هەرێمی کوردستان بەکۆی دەنگ بڕیاری پەسندکردنی پڕۆژەکەی دەرکرد.
تاوەکو کۆتایی ئەم ساڵ سەنتەری هەر چوار پارێزگای هەولێر، سلێمانی، دهۆک و هەڵەبجە کارەبای 24 کاژێریان پێ دەگات.
بەپێی دوایین ئاماری وەزارەتی کارەبای حکومەتی هەرێمی کوردستان، کارەبای 24 کاژێری بۆ دوو ملیۆن و 700 هەزار هاووڵاتی دابین کراوە، کە 40٪ی دانیشتووانی هەرێمی کوردستان دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ