کۆبوونەوەی سەرۆکی هەرێمی کوردستان لەگەڵ هەڵسووڕێنەری کاروباری باڵیۆزخانەی ئەمریکا لە بەغدا
رووداو-هەولێر
نێچیرڤان بارزانی و هەڵسووڕێنەری کاروباری باڵیۆزخانەی ئەمریکا کۆبوونەوە، پرسی مووچە و کێشەکانی نێوان هەولێر و بەغدا تاوتوێ کران.
ئێوارەی ئەمڕۆ شەممە، 23-08-2025، نێچیرڤان بارزانی، سەرۆکی هەرێمی کوردستان لە هەولێر پێشوازی لە ستیڤن ڤەیگن، هەڵسووڕێنەری کاروباری باڵیۆزخانەی ئەمریکا لە عێراق کرد و پرسی مووچە و پەیوەندییەکانی نێوان هەولێر و بەغدایان تاوتوێ کرد.
بەپێی راگەیێندراوی سەرۆکایەتیی هەرێمی کوردستان، لە دیدارەکەدا دۆخی گشتیی عێراق و هەرێمی کوردستان، پەیوەندییەکانی هەولێر ـ بەغدا، پرسی مووچە و شایستە داراییەکانی هەرێمی کوردستان و هەروەها پەیوەندییەکانی ئەمریکا لەگەڵ عێراق و هەرێمی کوردستان، گفتوگۆیان لەبارەوە کراوە.
لە کۆبوونەوەکەدا هەردوولا جەختیان لە برەودان بە پەیوەندییەکانی ئەمریکا لەگەڵ عێراق و هەرێمی کوردستان لەسەر بنەمای بەرژەوەندیی هاوبەش کردەوە و هاوڕا بوون لەسەر گرنگیی چارەسەرکردنی کێشەکانی نێوان هەولێر و بەغدا لەڕێگەی دیالۆگ و لێکتێگەیشتنەوە.
سەرۆکی هەرێمی کوردستان سوپاس و پێزانینی خۆی بۆ رۆڵی ستیڤن ڤەیگن لە برەودان بە پەیوەندییەکانی ئەمریکا لەگەڵ عێراق و هەرێمی کوردستان دەربڕی و ستایشی هەوڵەکانی بۆ لێکنزیککردنەوەی هەولێر و بەغدا کرد.
دوا پێشهاتەکانی ناوچەکە و چەند پرسێکی دیکەی جێگەی بایەخی هاوبەش، تەوەرێکی دیکەی کۆبوونەوەکە بوون، کە هەریەک لە سەرۆکی دیوان و سکرتێری ئەنجوومەنی وەزیرانی هەرێمی کوردستان و کۆنسووڵی گشتیی ئەمریکا لە هەرێمی کوردستان ئامادەی بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ