پۆلیسی سلێمانی: گوڵفرۆشەکەی سەر شەقام نەمردووە

 

رۆژی دووشەممە، 24-7-2023، سەرکەوت ئەحمەد، گوتەبێژی بەڕێوەبەرایەتیی پۆلیسی سلێمانی لەبارەی بڵاوبوونەوەی هەواڵی گیانلەدەستدانی عەبدولڕەحمان محەممەد، کە منداڵێکی 10 ساڵانە لە سلێمانی و بە گوڵفرۆشەکەی سلێمانی دەناسرێت، بە تۆڕی میدیایی رووداوی راگەیاند: "ئەو منداڵە کاژێر نزیک 11ـی شەوی 20ـی ئەم مانگە لە نزیک بەنزیخانەی بینایی لەسەر شەقامی شەشت مەتریی سلێمانی ئۆتۆمبێل لێیداوە و بەهۆیەوە گەیێندراوەتە نەخۆشخانەی شار و چەند رۆژێکە لەبەشی چاودێریی چڕە، بەبەراورد بەو کاتە ئێستا دۆخی باشتر بووە، بۆیە ئەو هەواڵانەی باسی مردنی دەکەن راست نین."

 

گوتەبێژی بەڕێوەبەرایەتیی پۆلیسی سلێمانی ئاماژەی بەوەدا، کەسوکاری منداڵەکە لە بنکەی پۆلیسی هەواری شار سکاڵایان لەسەر شۆفیرەکە تۆمار کردووە، بۆیە شۆفێرەکە دەستگیرکراوە و لێکۆڵینەوەش لە رووداوەکە دەستیپێکردووە."

 

عەبدولڕەحمان محەممەد، کە بە گوڵفرۆشەکەی سلێمانی ناسراوە، زۆربەی کاتەکان لە شەقامی بازنەیی مەلیک مەحموود و لە ترافیک لایتەکاندا گوڵ دەفرۆشێت.