رووداو دیجیتاڵ
دانیشتووانی چەند گەڕەکێکی ناحیەی پیرەمەگروون لەبارەی قیرنەکردنی کۆڵانەکانیان نیگەرانن؛ بەڕێوەبەری ناحیەکەش دەڵێت، بەهۆی قەیرانی داراییەوە پڕۆژەکانیان راگیراون، ئەگەرنا 100٪ـی کارەکانی تۆڕی ئاو و ئاوەڕۆ لە سنوورەکە تەواو بوون.
بەکر عەبدولکەریم، بەڕێوەبەری ناحیەی پیرەمەگروون بە (رادیۆی رووداو)ی راگەیاند، زیاتر لە 70٪ـی گەڕەکەکانی ناحیەکە خزمەتگوزاریی قیر و دروستکردنی شۆستەیان بۆ کراوە، بەڵام ئەو 30٪ـی ماوەتەوە بەهۆی قەیرانی دارایی و راگیرانی پڕۆژەکانی پەرەپێدانی پارێزگاکانەوە بووە.
سەبارەت بە تێچووی تەواوکردنی ئەو پڕۆژانە، بەڕێوەبەری ناحیەکە دەڵێت: "دەرخستەی قیرکردن و شۆستەی ئەو سێ گەڕەکەی ماون ئامادەیە، بەڵام پێویستی بە نزیکەی ملیارێک و 300 ملیۆن دینارە، بۆیە نەتوانراوە جێبەجێ بکرێت."
سەرەڕای کێشەی قیرکردن، بەڕێوەبەری ناحیەی پیرەمەگروون جەخت لەوە دەکاتەوە، لە رووی خزمەتگوزارییەکانی دیکەوە کێشەیان نییە و گوتی: "پڕۆژەکانی تۆڕی ئاو و ئاوەڕۆ 100٪ تەواو بوون، هەروەها لەڕووی دابەشکردنی ئاو و کارەباوە ناحیەکە هیچ گرفتێکی نییە."
لە سنووری ناحیەی پیرەمەگروون 46 گوند هەن؛ سەبارەت بە دۆخی گوندەکانیش بەکر عەبدولکەریم گوتی، رێگەی بەشێک لە گوندەکان پێش قەیرانی دارایی و بەشێکیشیان لە دوو سێ ساڵی رابردوودا قیر کراون، بەڵام هێشتا گوند ماوە رێگەکەی قیر نەکرابێت.
بەڕێوەبەری ناحیەی پیرەمەگروون ئاماژەی بەوەشکرد، سەرجەم گوندەکانی سنوورەکە تۆڕی کارەبای نیشتمانییان پێگەیشتووە و هەموو هەوڵێکیشیان بۆ ئەوەیە سەرەڕای ئاستەنگە داراییەکان، خزمەتگوزارییە بنەڕەتییەکان بۆ ناحیەکە بەردەوام بن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ