رووداو دیجیتاڵ
قایمقامی شاری ئەلیگودەرز لە پارێزگای لوڕستان دەڵێت، بەهۆی بارینی بەفری شەوی رابردووەوە، رێگەی هاتووچۆی لانیکەم 90 گوندی سەر بەو شارە داخراوە.
ئیمان خوسرەوی، قایمقامی شاری ئەلیگودەرز، بەیانیی رۆژی دووشەممە گوتی، بارینی بەفر لە شەوی رابردووەوە دەستی پێکردووە و ئەوەش وایکردووە رێگەی هاتووچۆی چەند بەرزاییەک لە ناوچە شاخاوییەکانی ئەو پارێزگایە بگیرێت.
بە گوتەی ئیمان خوسرەوی، لە هەندێک لە ناوچەکانی دیکەی سەر بە شاری ئەلیگودەرز، ئۆتۆمبیل تەنیا بە زنجیر دەتوانێت هاتووچۆ بکات.
بەیانیی رۆژی دووشەممە، ناوەندی کۆنترۆڵی قەیرانی شاری بروجێرد لە پارێزگای لوڕستان رایگەیاند، بەهۆی دابەزینی پلەی گەرما، بارینی بەفر و بەستنی رێگەوە قوتابخانەکانی قۆناخی سەرەتایی ئەو شارە دادەخرێن.
لە شاری دروودیش قوتابخانەکانی قۆناخی سەرەتایی داخران و قۆناخەکانی دیکەی خوێندنیش دوو کاژێر درەنگتر کرانەوە.
لە پارێزگای سنەش بەهۆی دابەزینی پلەی گەرماوە هەموو قوتابخانەکانی سنووری گوندەکانی سەر بە شاری بیجاڕ و قوتابخانە سەرەتاییەکانی نێوشار داخران و خوێندن لە رێگەی ئۆنلاینەوە دەبێت.
لە شاری بانەش لە بەیانییدا هەموو هەموو قوتابخانەکان داخران و لە شارەکانی مەریوان و دیواندەرەش دوو کاژێر درەنگتر کرانەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ