رووداو دیجیتاڵ
بڕیارە سەندیكای رۆژنامەڤانانی یەكێتیی ئەورووپا، بە هاوئاهەنگی لەگەڵ رێكخراوی پەیامنێران، سەنتەرێكی چاودێری لە هەرێمی كوردستان بكاتەوە. ئامانج لەو سەنتەرە چاودێریكردنی ئازادیی رادەبڕین و ئازادیی كاری رۆژنامەڤانیی دەبێت.
ئەمڕۆ شەممە، 26ـی نیسانی 2025، هۆزان قادر، سەرۆكی رێكخراوی پەیامنێران بە رووداوی گوت: "لەسەر بانگهێشتی رێكخراوەكەمان، شاندێکی سەندیكای رۆژنامەڤانانی یەكێتیی ئەورووپا، سەردانی هەرێمی كوردستانیان كردووە و لە ماوەى سێ رۆژ مانەوەیاندا بەشدارییان لە چەندین چالاكیی میدیایی و دیداری بەرپرسانی هەرێمی کوردستان کردووە."
بەگوتەی هۆزان قادر، بڕیار دراوە سەندیكای رۆژنامەڤانانی یەكێتیی ئەورووپا، سەنتەرێكی چاودێریكردن بە مەبەستی ئاگاداربوون لە دۆخی ئازادیی رادەبڕین و ئازادیی كاری رۆژنامەڤانی لە هەرێمی کوردستان بكاتەوە.
ئاربەر هیتای، سەرۆکی سەندیکای رۆژنامەڤانانی یەکێتیی ئەورووپا سەبارەت بە کردنەوەی سەنتەرەکە بە تۆڕی میدیایی رووداوی راگەیاند، "پەنجەرەیەکە بۆ لێکتێگەیشتن و کردنەوەی خولی راهێنان لە هەرێمی کوردستان و بەپێچەوانەوەش لە وڵاتانی ئەورووپا."
ئاربەر هیتای گوتیشی، "لەگەڵ بەرپرسانی هەرێمی کوردستان گفتوگۆمان کردووە و بەنیازین بۆ یەکەمجار لە مێژووی سەندیکاکەمان لە دەرەوەی یەکێتیی ئەورووپا، کۆنگرەی سەندیکاکەمان لە هەرێمی کوردستان بکەین."
سەندیكای رۆژنامەنووسانی یەكێتیی ئەوروپا لەساڵی 1963 دامەزراوە و لە 11 وڵات لقی هەیە، هەروەها خاوەنی سێ هەزار ئەندامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ