رووداو دیجیتاڵ
لە هەشت ساڵدا 368 کەس لە هەرێمی کوردستان بەهۆی تۆپباران و بۆردوومانەکانی تورکیا و ئێرانەوە گیانیانلەدەستداوە یان برینداربوون. لە ئەمساڵیشدا 87 شوێن لە هەرێمی کوردستان هێرشیانکراوەتەسەر، کە بەهۆیانەوە هەشت هاونیشتمانی گیانیان لەدەستداوە و پێنجی دیکەش بریندار بوون.
رۆژی سێشەممە، 26-9-2023، کامەران عوسمان، ئەندامی تیمی کوردستانی عێراقی رێکخراوی (CPT)ـیی ئەمریکی، بەتۆڕی میدیایی رووداوی راگەیاند: "لە مانگی ئابی ساڵی 2015ـەوە تاوەکو ئەمڕۆ بەهۆی هێرشەکانی تورکیا و ئێرانەوە 147 کەس لە هەرێمی کوردستان شەهیدبوون و 221 کەسی دیکەش برینداربوون، تەنیا لە ئەمساڵدا 8 کەس بەهۆی ئەو هێرشانەوە گیانیانلەدەستداوە و پێنج کەسی دیکەش برینداربوون."
بە گوتەی کامەران عوسمان ئەمە تەنیا ئاماری کەسانی سڤیلە، چونکە ئەوان ئامارەکانی گیانلەدەستدان و برینداربوونی گەریلاکانی پەکەکە تۆمار ناکەن.
سەبارەت بە هەوڵەکانیان بۆ وەرگرتنی ماف و ئیمتیازات بۆ کەسوکاری ئەو کەسانەی بەهۆی ئەو تۆپباران و بۆردومانانەی تورکیا و ئێرانەوە گیانیانلەدەستداوە، لەگەڵ بریندارەکانیش، کامەران عوسمان گوتی: "سەرقاڵی پڕۆژەیەکین بۆ تۆمارکردن ئامادەکردنی بەڵگەنامەی ئەو کەسانەی شەهید بوون و برینداربوون. بڕیارە مانگی تشرینی دووەمی ئەمساڵ سەردانی ئەنجوومەنی وەزیرانی عێراق بکەین و بەڵگەنامەکانیان رادەست بکەین."
کامەران عوسمان گوتیشی: "دەمانەوێت عێراق ئەو شەهیدانە بە شەهیدی نیشتمانی بزانێت و هەژمار بکات، سەرەتی بداتە کەسوکاریان، جگە لەوەش ئەوانەی کەمئەندام بوون بە کەمئەندام هەژماربکرێن و سەرەتیان هەبێت."
ئەو ئەندامەی ئەو رێکخراوە ئاماژەی بەوەدا پێشتر ئەنجوومەنی وەزیرانی عێراق رایسپاردوون بۆ کۆکردنەوەی زانیاریی لەسەر قوربانییانی تۆپباران و بۆردوومانەکانی تورکیا و ئێران لە هەرێمی کوردستان بە مەبەستی قەرەبووکردنەوەیان.
بەپێی بەدواداچوونی پەرلەمانی عێراق، لە ماوەی چوار ساڵی رابردوودا نزیکەی 23 هەزار پێشێلكاری لەلایەن ئێران و تورکیاوە بۆ سەر خاکی عێراق کراون کە لە هێرشەکانیاندا درۆن بەکارهێندراون و تۆپباران و مووشەک ئاراستە کراون، هێرشەکانیش سەرجەمیان لە هەرێمی کوردستان بوون.
بەپێی بەدواداچوونەکانی رێکخراوی CPT، تورکیا 64 بارەگا و بنکەی سەربازیی لە هەرێمی کوردستان هەیە، 55ـیان بارەگا و 9ـیان بنکەی سەربازین، کە بەم شێوەیە دابەش بوون:
- پارێزگای هەولێر: 14 بارەگای سەربازی، بەمشێوەیە دابەشکراون:
- سیدەکان: 12 بارەگا
- مێرگەسۆر: 2 بارەگا
- پارێزگای دهۆک: 41 بارەگای سەربازی، بەم شێوەیە دابەشکراون:
- ئامێدی، شێلادزێ، کانێ ماسی، بامەڕنێ و دێرەلووک: 23 بارەگا
- ئیدارەی سەربەخۆی زاخۆ: 18 بارەگا
هەروەها 9 بنکەی سەربازی هەن، کە شەشیان لە حەفتانین و سێیان لە سیدەکانن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ