نێچیرڤان بارزانی، جێگری سەرۆکی پارتی لە بانگەشەی حیزبەکە لە ئاکرێ.
رووداو دیجیتاڵ
نێچیرڤان بارزانی لە ئاکرێ و لەناو هەزاران لایەنگری پارتی جارێکی دیکە پشتیوانی هەرێـمی کوردستانی بۆ پرۆسەی ئاشتی لە تورکیا و باکووری کوردستان دووپاتکردەوە و رایگەیاند: "هەموو کات بۆ پشتیوانی ئاشتی ئامادەین".
نێچیرڤان بارزانی جێگری سەرۆکی پارتی دیموکراتی کوردستان لە بانگەشەی حیزبەکەی لە ئاکرێ رایگەیاند: "لە یەکەم رۆژی دامەزراندنی پارتییەوە ئاکرێ و ئەم سنوورە بەشێکی دانەبڕاو بوون لە خەباتی پارتی."
نێچێرڤان بارزانی لە بەردەم لایەنگرانی پارتی دیموکراتی کوردستان لە ئاکرێ جارێکی دیکە باسی چاڵێنجی یەک ملیۆن دەنگی بۆ حیزبەکەی کرد و گوتی: "بە پشتیوانیی ئێوە پارتی دەبێتە حیزبی یەکەمی عێراق و حیزبی یەک ملیۆنی و زیاتریش."
نێچیرڤان بارزانی باسی پێشمەرگایەتیی سەرۆک بارزانی دەکات و دەڵێ: "هەر کاتێک بەرەو چیای پیرس دەڕوانین، دەستپێکردنی خەباتی سەرۆک مەسعود بارزانی دەبینین".
نێچیرڤان بارزانی: ئاشتی رێبازی پارتییە
پرۆسەی ئاشتی لە تورکیا و باکوری کوردستان بەشێکی دیکەی پەیامەکەی نێچیرڤانی بارزانی بوو، جەخت لە پشتیوانی هەرێمی کوردستان بۆ پرۆسەکە دەکاتەوە و دەڵێ :" هەوڵدەدەین پرۆسەی چارەسەری سەرکەوێت، چەکدار و شەڕ لە گوندەکانی ئێمە نەمێنن و جووتیاران بگەڕێنەوە بۆ گوندەکانی خۆیان".
نێچیرڤان بارزانی لە پەیامەکەیدا ئاشتی وەکو رێباز و ئاوەدانی وەکو ئامانجی پارتی دیموکراتی کوردستان ناساند و رایگەیاند: "بانگەوازی بۆ ئاشتی دەکەین و هەموو کات بۆ پشتیوانی کردن ئاشتی ئامادەین و هەوڵەکانیشمان بۆ ئاوەدانییە."
جێگری سەرۆکی پارتی دیموکراتی کوردستان لەبارەی پێکەوە ژیانی ئاینییەکان لە ئاکرێ دەڵێ: "رابردوو و ئێستا سەلماندوویەتی پارتی حیزبی پێکەوە ژیانی هەموو ئایینەکانە".
نێچیرڤان بارزانی جەخت لەوە دەکاتەوە: "دەبێت پارتی سەربکەوێت تاوەکو کوردستان بباتە قۆناخێکی باشتر و ئارامی و ئاوەدانی لە کوردستان بەردەوام بێت".
باسی لەوەشکرد، ئامانجی پارتی دیموکراتی کوردستان ئەوەیە هاوشێوەی شارەکانی هەرێمی کوردستان، شارەکانی عێراقیش پێشبكەون و برایەتیی کورد و عەرەب زیاتر بێت."
سیستمی فیدراڵیی عێراق و بەهێزکردنی یەکێکە لەو خاڵانەی پارتی دیموکراتی کوردستان لەم هەڵبژاردنەدا جەختی لێدەکاتەوە؛ نێچیرڤان بارزانیش لەوبارەیەوە گوتی: "پەرلەمانتارانمان لە خولی داهاتوو دوو کاری سەرەکیان هەیە: یەکەم دەبێت ئەو یاسایانەی دەردەچن فیدراڵی بن چونکە رۆحی دەستووری عێراق هاوبەشی و سازانە، دووەم: یاساکانی سەردەمی رژێمی پێشوو بگۆڕدرێن تاوەکو سیستمی عێراق ببێتە سیستمێکی فیدراڵی".
نێچێرڤان بارزانی پەیوەندیییەکانی ئێستای نێوان هەرێمی کوردستان و عێراق بە "حوکمی مەرکەزی" ناوبرد و راگەیاند: "ئەم هەڵبژاردنە گرنگە بۆ جێبەجێکردنی دەستور و دەستپێکردنی قۆناخێکی نوێی ئاوەدانی."
نێچیرڤان بارزانی داوای لە لایەنگرانی حیزبەکەی کرد :"بەبێ دوودڵی بڕۆنە ناو خەڵکەوە و داوای دەنگ بکەن، داوا بکەن هەمووان دەنگ بە پارتی بدەن، دەنگ بدەن بە کوردستانێکی بەهێز و ئاوەدان و پێشكەوتووتر".
دەقی گوتارەکەی نێچیرڤان بارزانی لە ئاکرێ:
جهماوهرێ هێژا،
خوشك و برایێت خۆشتڤى،
ئهز بێژم، ئەز باوەر دكەم پشتى من ئهڤ ههمى جهماوهره دیت، پشتى من گهرموگوڕیا هنگۆ دیت، ئێدى دڤێت ئهم بێژین (ملیۆن و زێدهتر).
ئەگەر ئەز ببێژم ملیۆن و زێدەتر، بەرسڤا هەوە چییە؟ ب ئێك دەنگ..
جهماوهرێ دلسۆز و پارتیپهروهر،
كادر و ڕێكخستنێت ماندینهناسێت پارتى، لناڤ خزم و عهشیرەتێت مه یێت دهڤهرێ، زێبارى، ئاكرهیى، سورچى، ههركى و گۆران، ل ئاكرێ، بهردهڕهش، دینارتە، بجیل، ل گرەسێن و ڕۆڤیا، دارەتوو، كەلەك ههمى گوند و دهڤهرێت وان، گهلهك و گهلهك خۆشحالم ئەڤرۆ ب دیتنا هنگۆ، ب دیتنا ڤێ جۆش و خرۆشا ل ناڤ هنگۆ ئەم دبینین، دلگهرمییەكێ ددەتە مە وەكو پارتی كو ڤێ جارێش هنگ دێ پارتی سەربلند كەن و سەرفەراز كەن.
ئهم یێت هنگۆ دبینین، بێ شك ئەڤرۆ ل تەلەڤزیۆنێش خەلكێ دی ژی هنگۆ دبینیت، پەیاما ئەڤى جەماوەرەی پەیاما چییە؟ پەیامەكە كو ئەم حزبا خۆ ناهێلین و دێ سەرفەراز و سەركەفتی هنێرینە بەغدا.
ههڤال و جهماوهرێ هێژا،
كهسوكارێت خۆشتڤى یێت شههیدێت نهمر كو ئهڤ دهڤهره خودانا زۆرترین شههید و تێكۆشهرایه، بهرى كو پارتیش ههبیت، دگەل شێخ عبدالسلامێ بارزانی خەباتا ڤێ دەڤەرێ یا دیارە، خەباتا ئاكرێ یا دیارە بەری دروستكرنا پارتی دگەل شێخ عبدالسلامێ بارزانی. جەنابێ سەرۆك بارزانی سهرهاتییهكێ لسەر كەسەكێ ئاكرەیی ڤەدگێڕیت كو ناڤێ وی (حەجی عەبدالێ ئاكرەیی)یە.
ئەڤ تێكۆشەرە دگەل بارزانییا یێ ل زیندانێ بووی ل مویسل، دیارە پشتی دانوستانا، بڕیار یا هاتیە دان بارزانی بهێنە ئازادكرن، وەختێ دچنە ژۆر پرسیارێ پێ دكەن و دبێژنێ هەر كەسەكێ بارزانی بیت بلا ناڤێ خۆ بنڤیسیت، وهسا دزانن كو ئەو دێ بارزانییا بۆ بدارڤەكرنێ هنێرن، حەجی عەبدال دبێژیت ناڤێ كوڕێت منیش بنڤیسن، ئەمیش دێ ناڤێت خۆ نڤیسین بارزانی.
خەلكەك دێ چیتە دەڤ وان، دبێژنێ: تو بخۆ یێ بتەمەنی، بەس كوڕێت تە د گەنجن، تو بۆچی دێ وان بۆ بدارڤەكرنێ دێ هنێری؟ ئەو دبێژیت و دێ بەرسڤا وان دەت و دبێژیت: ئەگەر بووە خویندان، ئەگەر بووە قوربانیدان، ئەگەر بووە شۆڕەشگێڕی، ئەگەر بووە خوینڕێتن بۆ كوردستانێ، ئەم هەمی بارزانینە.
من دڤێت چ ببێژم؟
خەلكێ ڤێ دەڤەرێ دگەل شێخ عبدالسلامێ بارزانی پەیمانا گرێدای و هەتا ئەڤرۆ ژی یا بەردەوامە و ب ئانههییا خودێ بۆ داهاتی ژی دێ یا بەردەوام بیت.
ژ ڕۆژا ئێكێ كو پارتى هاتیه دامهزراندن و ههتا ئهڤرۆ، ئاكرێ و ئەڤ سنوورە بهشهكێ دانهبڕى بووینه ل خهباتا پارتى. هێز و پشتهڤانی و وهفادارییا هەوە بۆ كوردینیێ و بۆ پارتى و بۆ ڕێبازا بارزانى، بەرپەڕەكێ زێڕینە د دیرۆكا ڤی مللەتیدا.
ئهڤرۆ ژى، لسهر ههمان ڕێك و ڕێباز دبهردهوامن. ئهڤرۆ ژى، ب هێز و پشتهڤانیا هنگۆ، ب ههوڵ و ماندیبوونا هنگۆ، پارتى دیسا ل عێراقێ دێ بیته حزبا ئێكهم ل سەرانسەری عێراقێ. ب پشتەڤانییا هەوە پارتی دێ بیته حزبا ملیۆن و زێدهتر.
ئاکرێ هەر ب تنێ شارەکێ خۆش نییە، سیمبۆلەکا گەشا کوردستانێ یە. کوراهییا مێژوویێ و کەلها بەرخۆدانێ یە. جوانییا ڤێ دهڤهرێ گەلەکا نموونەیی یە. مێژوویا ئاکرێ هزاران سالی یە. ئێك ژ باژێڕێت بەری زایینێ یە. ئێکە ژ مەلبەندێت شارستانییا دەڤەرێ. ئاكرێ دەرگەهێ سەرهەلدانا ساڵ 1991ێ یا دەڤەرا بەهدینا بوویە.
بیناسازییا ئاکرێ، ئێک ژ جوانترین و کەڤنترین بیناسازى یێت کوردستانێ یه. نموونەیەکێ زۆر جوان یێ بیناسازییا کورد و کوردستانێیە. بهردهڕهش بەرەوام مەڵبەندەكا كوردینیێ و خەباتێ بوویە، نۆكە ژی ژێدەرەكێ ژیانێیە بۆ خەلكێ ڤێ دەڤەرێ و بۆ كوردستانێ. ئەڤ دەڤەرە ههمى ب خهلك و دلسۆزێت خۆ دجوانن، دەنگێت وانیش بۆ لیستا ٢٧٥ پارتیا دیموكراتا كوردستانن.
ههڤالێت هێژا
جهماوهرێ خۆشتڤى،
ئەز بێژم، ئەز باوەر دكەم هنگ بلەزن كو بەحسى پایتەختێ نەورۆزێ بکەم. پیرۆزباییێ ل هەوە دكەم، ل ههمى خهلكێ ڤێ دهڤهرێ و كوردستانێ هزار جارا پیرۆز بێت ئەو پایتەختبوون، پایتەختێ نەورۆزێ. هنگۆ نەورۆزا گەشتر کری. هنگۆ بەرێ هەمى کوردا و زۆر گەشتیارێت بیانی یێ دایە کوردستانێ. بیرا من تێت ڕەوشەنبیر و گەنجێت ئاکرێ و ڤێ دهڤهرێ، بەری چەند سالا چاوا هەول ددان کو سال بۆ سالێ نەورۆزێ ل ئاکرێ گەشتر بکەن. دەستێت هنگۆ دخۆش بن.
ئهڤ دهڤهره ڕۆژ بۆ ڕۆژێ یا گەشتر دبیت، دلێ مە ژی پێ گەش دبیت وەختێ ئەم ڤێ گەشاتیێ دبینین ل ئاكرێ، ل هەوە پیرۆز بیت. گەشبوونا زێدەترا ڤێ دهڤهرێ یا مسۆگەرە ب سەرکهفتنا لیستا ژمارە ٢٧٥ یا پارتی دیموكراتی كوردستان.
ئهڤ دهڤهره هاڤینگەها کوردستانێیە. گەلەک جهێت ڤێ دەڤەرێ هەنە، ئەگەر ڕۆژەک بێت گەشتیار بشێن بچنه وا جیا، دێ گەشتیاری لڤێرێ گەلەک زێدە بیت. ئەم هەول ددەین پرۆسەیا چارەسەریێ سەرکەڤیت، چەکدار و شەڕ ل گوندێت مە نەمینن و جۆتیار ڤەگەڕن بۆ سەر گوندێت خۆ.
مە هەمى جارێ گۆتییە. ئاشتی ڕێبازا مەیە، ئاڤەدانی ئارمانجا پارتی دیموكراتی كوردستانە. ئاشتی و ئاڤەدانی پێکڤەنە و ئەم بۆ هاریکارییا ئاشتیێ هەرگاڤ ئامادەینە. بانگەوازیا مە بۆ ئاشتیێ یە، هەولا مە بۆ ئاڤەدانیێ یە. بۆ خورتكرنا ئاشتیێ و بۆ زێدەکرنا ئاشتی و ئاڤەدانیێ، ڕۆژا 11/11 دەنگێ خۆ بدەنە لیستا ٢٧٥ یا پارتی دیموکراتی کوردستان.
ههر ژ ڕۆژا ئێكێ هەڤالینە و ههتا نۆكه، چ جارا نەبوویە پارتی و خهلكێ ڤێ دهڤهرێ دگەل ئێکدا نەبووبن. هندی پێشمەرگە هەبووبن، ڤێره ژی مەلبەندێ خەبات و شۆڕەشگێڕییا وان بوویە. وەختێ ئەم بەرێ خۆ بدەینە سەرێ ئاکرێ و چیایێ پیرس، مێژوویا شۆرەشگێڕییا بارزانیێ نهمر و پێشمەرگێت قەهرەمانێت كوردستانێ دێ بینین.
وەختێ ئەم بەرێ خۆ دەدەینە چیایێ پیرس، دەستپێکردنا خەباتا سەرۆک مەسعود بارزانی ئەم دبینین كو دەستپێكرنا وێ ل ڤێ دەڤەرێ بوویە. ڕۆژا ٢٠ێ گولانا ساڵا ١٩٦٢ێ سەرۆک بارزانی یێ هاتییە سەرێ پیرسی و ل ڤێ دەڤەرێ بۆ ئێکەم جار یێ بوویە پێشمەرگە.
سالێت ١٩٦٢ و ١٩٦٣، مەزنترین داستانێن قەهرەمانیێ ل سەرێ ئاکرێ و چیایێ پیرس یێت هاتیە تۆمارکرن. ل ڤان چیایا، بارزانی و پێشمەرگێت قەهرەمانێت وی، سوپایێ ههردو دەولەتێت عێراقێ و سووریا یێت تێشکاندی. ئهڤ دهڤهره و خهلك و عهشیرێت ڤێ دهڤهرێ، عهگیدێت بەرخۆدانێ یێت شۆرەشا گولانێ بووینه. بهردهوام ئەڤ دەڤەرە جهێ پەروەردەکرنا پێشمەرگێت قەهرەمان بووینە.
ئەڤرۆ خەلكێ ڤێ دەڤەرێ، خەلكێ ڤێ سنوورى، ل مویسلیش، ل باژارێ مویسلیش هێزەكا مەزنن بۆ پشتەڤانییا پارتی و سەرئێخستنا لیستا پارتی بۆ پەرلەمانێ عێراقێ.
گوندەکێ ڤێ دهڤهرێ و کۆلان و تاخەکا ئاکرێ نینە، قەهرەمانییا پێشمەرگێت پارتی لێ نەهاتبیتە تۆمارکرن. ل ڤێ دەڤەرێ، چاوا ژیانا موسلمان و مەسیحییا پێکڤە بوویە، وهسا ژى قەهرەمانی و خوینا پێشمەرگێت موسلمان و یێت مەسیحی هەرگاڤ یا تێکەلی ئێك بووی.
پارتی بەرێ و نۆکە ژی یا سەلماندی، حزبا پاراستنا ئایین و پێکڤەژیانا ئایینی یە. حزبا هەقی و حزبا نیشتمانپەروەریێ یە. حزبا کردارایە، حزبا ئاڤەدانیێ یە ل هەمی كوردستانێ. ئەز پشتڕاستم ب گەرماتییا هەوە، ئەز پشتڕاتم ب پشتگیرییا هەوە، ئەزێ دبینم پارتى دێ سهركهڤێت، پارتی دێ سهركهڤیت.
پارتی دێ سهركهڤیت، دا كوردستانێ ببهته قۆناغهكا باشتر. دا ئارامى و ئاڤهدانى، خزمهت و پێشكهفتن، ههر و ههر بهردهوام بن ل ڤێ دەڤەرێ و ل هەمی دەڤەرێت كوردستانێ. دا كو بشێت ئاكرێ و بهردهڕهش و ڤێ دهڤهرێ ههمیێ، جوانتر و گهشتر بكهت. پارتی پێویستە ب هێز و ب پشتەڤانییا هەوە ل بەغدا یا ئامادە بیت بۆ سەركەفتنا ئاڤەدانییا كوردستانێ.
هەڤالینە،
خەلكێ خۆشتڤیێ ڤێ دەڤەرێ،
ئاكرێ و بەردەڕەش،
دڤێت هنگ سۆزەكێ بدەن كو پارتى بهێزهكا زێدهتر پنێرنه بهغدا. وهكى مه چهند جارا گۆتى، دیسا دێ دوبارە كەین و دێ بێژین، بهێزبوونا پارتى ل بهغدا، بهێزبوونا كوردستانێ یه. بهێزبوونا پێكڤهژیانێ یه. بهێزبوونا ئارامیێ یه، بهێزبوونا ئارامیێیە. گەلی جحێلا و جەماوەرێ خۆشتەڤی، ئەز باوەر دكەم، زۆربهى ههره زۆر یا دەنگێت هنگۆ یێت پارتینە، ئەڤێ مە شك تێدا نییە، بەلێ مە دڤێت، مە ئێك ئارمانج هەیە، مە دڤێت هەمى دەنگ بۆ پارتی بن، هەمی دەنگ بۆ پارتی بن.
ئەم دێ بەرێ خۆ دەینە وان ئهوێت کو هەتا نها بڕیارا خۆ نەدای، ئەم دێ بێژینە وان ئەوێت كو بڕیار نەدای، دەنگێت خۆ بدەنە پارتی، لسەر ڤان چیا و ل ناڤ ڤان تاخ و کۆلانا، قەهرەمانی و خوینا کێ هەیە؟ کێ چریسکا شۆڕەشێ ڤێ خستییە؟ کێ ئێمناهی ئینایە؟ کێ ئاڤەدانی ئینایە؟ ئەڤان پرسیارا ل خەلكی بكەن، بەرسڤا ڤان پرسیارا، ئێك حزبە، ئەو ژی پارتى دیموكراتى كوردستانە.
پشتڕاست بن هەڤاڵینە، باوەری وە هەبیت کو میللەتێ مە یێ ل سەر حەقیێ، وەكی جەنابێ سەرۆک بارزانی یێ گۆتییە مە، پارتی بۆ مە ئامرازه و کوردستان ئارمانجا مەیە، بارێ مە یێ گرانە، كوردستانە ئارمانجا مە.
خەلكێ خۆشتەڤیێ ڤێ دەڤەرێ،
ئەز حەز دكەم تشتەكی بێژمە هنگۆ، پشتڕاست بن داخوازێت هنگۆ ل ڤێ دەڤەرێ، بەرنامێ کارێ حكوومەتا هەرێما كوردستانێ یە. حكووموتا هەرێما كوردستانێ دێ ب هەمی هێزا خۆ هەول دەت ئەو داخوازی یێت هنگۆ ل ڤێ دەڤەرێ بهێنە جیبجیكرن.
گەلەک جارا، هەمى لایەنا پارتی یا بتنێ هێلای بۆ بەرگرییا لەشکەری و سیاسی و یاسایی، بەلێ ئەڤە نەخەمە، چونکی پارتی خودانا خەم و ڤیان و دۆزا گەلێ کوردستانێ یە. دڤێت دەنگێ هەمیا و کورد و کوردستانییا بۆ پارتى بیت، ئهویێت كو ئامادە نینە دەستى ل خاک و قەوارە و دەسهەلاتا کوردستانێ بەردەن.
داخوازێ ل کادر و جهماوهرێ پارتی دکەم، دەنگێت پارتی ل ڤێ دەڤەرێ زێدە بکەن. داخوازێ ل ههمى دەنگدەرێت پارتی دکەم، کەس نەبێژیت دەنگێت پارتی دزێدەنە، ئێك دەنگ بۆ پارتی زۆرە و پێویستە ڕۆژا دەنگدانێ ئەم هەمی پێكڤە بێی كو ئێك دەنگ ژی كێم ببیت، بچینە سەر سندۆقێت دەنگدانێ و دەنگی بدەینە پارتی و بەرەڤ ئێك ملیۆن و زێدەتر.
پارتی ڤێ قۆناغێ پێویستی ب هەوە هەیە. بارێ كادیر و كاندیدێت پارتی ل بەغدا یێ گرانە، کارێ پارتی ل بەغدا پاراستنا قەوارا هەرێما کوردستانێ یە. موكمكرنا برایەتییا ناڤبەرا عەرەب و كوردایە، ئەڤە كارەكێ گرنگە و خزمەتكارێت هەوە ل بەغدا دێ كارەكێ جددی لسەر ڤێ چەندێ كەن.
ئەو داخوازی یێت ئەم بۆ كوردستانێ دكەین، بۆ جهێت دی یێت عێرقێ ژی داخواز دكەین. مە چەوا دڤێت ئاكرێ یا پێشكەفتی بیت، مە چەوا دڤێـ زاخۆ یا پێشكەفتی بیت، سلێمانیێ و جهێت دی یێت هەرێما كوردستانێ د پێشكەفتی بن و هەولێر یا پێشكەفتی بیت، هەروەسا ئەم دخوازین باژێڕێت دی یێت عێراقێ ژی پێشكەفتی بن و برایەتییا كورد و عەرەبان زێدەتر و زێدەتر ببیت.
ئێك ملیۆن و زێدەتر.
دەنگدەرێت پارتی پرسیارهكێ بكەن ل وان كەسا ئەڤێت كو دەنگێ خۆ ددەن و بێژنێ:
ڕۆژێت گران و دژوار، كى بەرڤانێ ئاخا كوردستانێیه؟
ل بهغدا، كى پارێزڤانێ مافێ گەلێ کوردستانێ یە؟
كییە؟
ئەڤان پرسیارا وەك هەوە گۆتی ئێك بەرسڤا هەی، بەرسڤا وێ پارتی دیموكراتی كوردستانە. پارتییە پارێزەرا كوردستانێ، پارتییە پارێزەرا ئاڤەدانیێ و سەقامگیرییا كوردستانێ. ئەگەر پارتی یا بهێز بیت، كەس نەشێت دەستدرێژیێ بكەتە سەر مافێت گەلێ كوردستانێ. ب دەنگێ خۆ ئەڤرۆ سۆزا خۆ بدەنە پارتی، پارتی بهێزڤە پنێرنە بەغدا، ڕۆژا دەنگدانێ ب دەنگێت خۆ سندۆقێت دەنگدانێ تژی بكەن ب ژمارە 275.
هەڤالینە،
ئەڤ هەلبژارتنە بۆ مە دگرنگن، گەلی جحێلا ئەڤ هەلبژارتنە بۆ مە یا گرنگە، مە یێ گۆتی و دێ بێژینەڤە: ڤێ جارێ ئارمانج و کارێ پەرلەمانتارێت پارتی دێ هەولدان و خەبات بیت، بۆ جیبجیکرنا دەستوورێ عێراقێ. بەری نها مە یێ گۆتی كو جێبەجێنەكرنا دەستووری چەند زرار گەهاندییە كوردستانێ، هند ژی زەرەر یا گەهاندییە مویسل و هند زەرەر ژی یا گەهاندییە بەسرا.
داخوازا مە یا جێبەجێكرن دەستوورێ عێراقێ، بۆ هەمی عێراقییایە، خەما مە خەما كوردستانێیە، خەما هەمی عێراقییایە. ئەڤ پەرلەمانتارێت مە پێویستە دو كارێت بنگەهین بكەن: یاسایێت نوى کو تێنە ئامادەکرن و پەسەندکرن، پێویستە فیدرالی بن و ب شێوەیەکێ تەوافوقی بن، ژبەر چ؟ چونکی ڕوحا دەستوورێ عێراقێ ههڤسهنگى و سازانه.
دویەم، یاسایێت مەرکەزی یێت سەردەمێ ڕژێما بهرێ، پێویستە بێنە گۆڕین، بۆ؟ دا سیستەمێ عێراقێ ببیتە سیستەمەكێ فیدرالی. ئەو پەیوەندییا نها یا ناڤبەرا مە دگەل بەغدا نە فیدرالییە، حوكمەكێ مەركەزییە. عێراق د قۆناغێت زەحمەتدا دەرباس بوو، ئەڤ هەلبژارتنە هەلبژارتنێت گرنگن بۆ جێبەجێكرنا دەستوورێ عێراقێ و ب ئانههییا خودێ قۆناغەكا نوى ل ئاڤەدانی و گەشكرنا كوردستانێ دێ دەستپێكەت.
هەڤالینە،
پارتی بهێز بکەن، چونکی پارتی خەباتەکا مەزن یا دایە بەرخۆ بۆ خزمەتا خاک و خەلکێ کوردستانێ. هەمى خهلكێ قەزا ئاکرێ و بەردەڕەش و دەوروبەرێ وان، هنگ هەمى دەنگێ خۆ بدەنە پارتی، داکو دەنگێت پارتی ببنە ئێك ملیۆن و زێدهتریش.
جەماوەرێ خۆشتڤی، ب جۆش و خرۆشا خۆ گازیكەن و هەوار كەن: ئێك ملیۆن و زێدەتر، بۆ كی لیستێ؟ سۆز و پەیمانا مە بۆ لیستا ٢٧٥ یا پارتی دیموکراتی کوردستان.
جهماوهرێ هێژا،
كورستانپهرهوهر و پارتیپهروهرێت خۆشتڤى یێت دەڤەرا ئاكرێ و بەردەڕەش،
هنگ و خهلكێ كوردستانێ، خودانێت پارتینه. باب و باپیرێت هنگۆ ب ڕێكا پارتى خزمهتا كوردستانێ یا كرى. مێژوو و دهستكهفتێت پارتى، جهێ سهربلندى و شانازیێنه. پارتى، سهركردایهتى و ڕێبهرییا شۆڕهش و سهرههلدانێت كوردستانێ یا كر. هەڤالینە، پارتى وهلاتهكێ وێران ل دهڤهرهكا نه ئارام و نه سهقامگیر، كره ئێك ژ جهێت ئاڤهدان لسهر ئاستێ ڤێ ناوچێ.
پارتى بنگههێ دیموكراسیێ و ئاڤاكرنا جڤاكهكا مهدهنى ل كوردستانێ دانا، بۆ گهنجێت كوردستانێ دەرفەت چێكر. پارتى ڕۆلێ ئافرهتێ و مافێت ئافرهتێ گهرهنتى كر. پارتى، پێكڤهژیان و برایهتیا ناڤبهرا ههمى پێكهاتا پاراست، ههر چ ئایین و نهتهوه بن. پارتى، ب تۆڕهكا مهزنا پهیوهندییا، كوردستان دگهل ڤێ ناوچێ و دگهل جیهانێ ههمیێ گرێدا.
پارتى باوهرى بخۆبوون، خهون و ئومێد بۆ پاشهڕۆژهكا گهشتر، د دلێ ههمى كوردستانییادا چاندن. بتایبهتى دبێژمه گهنجێت مە ئەڤرۆ، كوردستانێ گهلهك قۆناغێت گران دهرباز كرن، هنگۆ باوهرى بخۆ هەبیت گەنجێت كوردستانێ، ئاڵایێ 79 سالێت خەباتا پارتی د پاشەڕۆژێدا یێ د دەستێ هەوەدا، ڤی ئالای بلند ڕاگرن و چ جارا نەهێلن بشكێت.
پارتى سهركێشه بهرهڤ كوردستانهكا ئاڤاتر، پێشكهفتیتر، مهدهنیتر، ئەڤە خەونێت پارتینە، ئەڤ خەونە چەوا دێ هێنە دی؟ ئەڤ خەونە دێ هێنە دی، كو ئەڤ نفشێ گەنج ئەڤ ئالایێ 79 سالە پارتی هەلدگریت، پێویستە هنگ ڤی ئالایەی هەلگرن و پارتی ل ڤێ قۆناغێ بەرەڤ قۆناغەكا گەشتر و بەرەڤ قۆناغەكا بهێزتر ببەن ب ئانههییا خودێ.
ژبەر هندێ هنگ سەربلندن، هنگ سهربلندن ب مێژوو و هزر و بیر و دهسكهفتێت حزبا خۆ. لبهر هندێ، بێ دودلى، ههڕنه ناڤ خهلكى و داخازا دهنگا بكهن بۆ پارتى. داخازێ بكهن ههمى دهنگى بدهنه پارتى، دهنگى بدهنه كوردستانهكا بهێز، كوردستانەكا ئاڤا، كوردستانەكا پیشكهفتیتر. دهنگێ خۆ بدهنه لیسا 275 یا پارتی دیموكراتی كوردستان.
ئەز داخوازێ ل وە دكەم ب ئێك دەنگ ڤێ جۆش و خرۆشا ئەڤرۆ یا هەوە، ڕۆژا دەنگدانێ ئامادە بن لسەر سندۆقێن دەنگا و دەنگێت خۆ بدەنە خزمەتكارێت خۆ ئەوێت كو دێ ب ناڤێ وە چنە بەغدا و دێ بەرگریێ ل مافێت هەوە كەن. هەر بژین، سۆزا مە ڤێكڕا بەرەڤ ئێك ملیۆن دەنگ و زێدەتر، سۆزا مە بەرەڤ ئێك ملیۆن دەنگ و زێدەتر.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ