بافڵ تاڵەبانی لە دیداری یەکێتی: پاشکۆی هیچ حیزب و وڵاتێک نابین

 

بافڵ تاڵەبانی، سەرۆکی یەکێتی لە دیداری یەکێتیدا بەشداری لە گفتوگۆیەکدا کرد و لەسەر پلانی یەکێتی بۆ داهاتوو، سیاسەتی یەکێتی و پەیوەندی لەگەڵ حیزبەکانی دیکە، چینی گەنجان، ناڕازیبوونی یەكێتی لە حکومەت، کۆبوونەوەی حیزبەکان و پلاسخارت هەڵوێستی خۆی خستەڕوو. 

 

لەبارەی سیاسەتی یەکێتی و پەیوەندی لەگەڵ حیزبەکانی دیکەدا بافڵ تاڵەبانی گوتی، "وەک یەکێتی سیاسیەتی خۆمان هەیە، پاشکۆی هیچ حیزب و وڵاتێک نابین."   

 

 

 

بافڵ تاڵەبانی: چاوەڕێی زۆر پرسیارم دەکرد، چاوەڕێی ئەو پرسیارەم نەدەکرد، پێموایە بە پرسیاری ئاسان دەستپێدەکەیت و دواتر قورستر دەبێت. جارێ 12 کۆبوونەوە کەمە، زۆر دڵخۆشم ئەگەر لە رۆژێکدا 12 کۆبوونەوە بکەین، بەڵێ وایە وازم لە وەرزش هێناوە، زیاتر لە ساڵێکە وەرزش ناکەم، لەبەر چەند هۆکارێک، یەکەمیان؛ دوای رووداوەکانی 8ـی مانگ دڵم تۆزێک ئەزیەتی هەبوو، پێویستم بە پشوودان هەبوو. دوای ئەوەش خراپ کەوتم چەن ماسولکەیەک لە قۆڵم دڕا، دوای نەشتەرگەرییەک ئێستا باشتر بوومەتەوە، سوپاستان دەکەم کە نیگەرانی تەندروستیمن، تەندروستیم زۆر باشە و هیچ کێشەی نییە بۆشتان دەسەلێمێنم کە دەست بە وەرزش دەکەمەوە و بەڵێنیشتان پێدەدەم تا 19ـی 2 رۆژی لەدایکبوونم 200 کیلۆگرامتان بۆ دێت لیفت دەکەم و دەشیخەمە سەر ئینەرنێت. 

 

 

بافڵ تاڵەبانی: رای من وەکو رای کاک قوبادە، بەڵێ ئەم دیدارە دەبێتە تەواوکەری کۆنگرە، بەڵام رام تۆزێک جیاوازە لە هەندێک لە برادەرەکانی کە قسەیان لەگەڵدا دەکەم. من پێموایە دەمێک ساڵ بوو کۆنگرە نەکرابوو، واقیعیش نەبوو تەسەور بکەین بە کۆنگرەیەک هەموو کێشەکانی یەکێتی نیشتمانی کوردستان چارەسەر دەبێت. باشترین و رێکوپێکترین کۆنگرەمان بکردابووایە پێموایە هەر پێویستمان بەم دیدارە دەبوو.

 

زۆر دەمێکە ئێمە دانەنیشتووین بە یەکەوە، پرسیاری قورسمان لە خۆمان نەکردووە تا بزانین بۆ هەرێمی کوردستان وایە؟ بۆ عێراق وایە؟ بۆ پارچەکانی دیکەی کوردستان وان؟ سیاسەتی ئێمە بۆ ئەو کێشانە چی بێت؟ بۆیە دەستخۆشی لە هەر هەموو ئەو هەڤاڵانە دەکەم کە ئەو دیدارەیان رێکخستووە و ئەوانەی کە بەشداری دیدارەکەشن، چونکە ئەو پرسیارانە هەر دەبووایە لە خۆمانی بکەین.

 

 

بافڵ تاڵەبانی: ئەگەر کادرە بە ئەزموونەکانمان وا بیردەکەنەوە، ئەوە هەڵەی ئێمەیە کە نەمانتوانیوە تێیان بگەیێنین چەند رێزیان دەگرین، چەند پێویستیمان بە ئەزموونی ئەوان هەیە و چەند خۆشەویستن لەلای ئێمە. کە باسی یەکێتی دەکرێت زۆر گوێم لێدەبێت یەکێتی تازە.. یەکێتی تازە.. راستییەکەی من حەزم لەوە نییە. یەکێتی با ببێتەوە بە یەکێتی مام جەلال با ببێتەوە بە یەکێتی ئێمە، من پێموایە پێویستمان بەوەیە کۆمەڵێک گەنج، بەشێکی ژنان، چەندین لایەنی دیکە خوێنی یەکێتی تازە بکەینەوە، بەڵام شان بەشان لەگەڵ کادرە کۆن و بە ئەزموونەکانمان. من پێموایە بە یەکەوە دەتوانین ئەو حیزبە زیاتر ببەینە پێشەوە، ناڵێم ببەینە پێشەوە چونکە چووینەتە پێشەوە، بەڵام زیاتر دەتوانین بیبەینە پێشەوە.

 

 

بافڵ تاڵەبانی: وابزانم هەر خۆم زیاتر لە 31 کاژێر و نیو دانیشتنم لەگەڵ گەنجەکانی کوردستان بە گشتی کردووە، نەک هەر گەنجەکانی سلێمانی. بەڕاستی یەکەمجار کە لەگەڵیان دانیشتنم پرسیارەکەم بۆ ئەو هەڤاڵانە ئەوەبوو بۆ ئێوە خۆپیشاندان دەکەن؟ بەڵام دوای یەکەمین کۆبوونەوە پێویستیکرد پرسیاریان لێ بکەم بۆ نەتانکردووە تاوەکو ئێستا؟ بەو خودایە ئەو رۆژانەی لەگەڵ ئەو خوێندکارانە دانیشتبووم شەرمم دەکرد کە ئێمە لە حکومەتێکین کە توانیویەتی وا ئەو گەنجانە فەرامۆش بکات. کە دانیشتم لەگەڵیان زۆر زوو تێگەیشتم کە زۆر شت هەیە ئێمە دەتوانین لێیان فێربین، زۆر زیرەک و بەتوانان، بەڵام بە داخەوە خەریکە هیوایان نامێنێت. ئێمە دەبێت هیوایان پێ ببەخشینەوە. ئەم گەنجانە ئەو حیزبە بۆ پێشەوە دەبەن، ئەم گەنجانە ئەو وڵاتە بۆ پێشەوە دەبەن.. کە من بینیم ئەم گەنجانە زۆر زوو تێگەیشتم ئەوەی کە ئێمە هەمانە نە نەوتە نە غازە، ئەوەی کە ئێمە هەمانە ئەو گەنجانەن. ئێمە دەبێت رێگە خۆش بکەین بۆ ئەو گەنجانە بێنە ناو حیزبەکەمان و ناو حکومەت هاوکارمان بن، چونکە دڵنیابن ئەو نەوەیە شتێکی زۆر سەیرە.. من کە دانیشتنم لەگەڵیان دەیان شت فێربووم. بۆیە داوا لە گەنجان دەکەم متمانەیان بەخۆیان هەبێت، سەلماندوویانە دەتوانن شت بگۆڕن، بەڵام بەوە رازی مەبن، من حەز دەکەم بێنە نێو یەکێتی نیشتمانی کوردستان یان چ حیزبێک کە بڕوایان پێیەتی چونکە وا دەتوانن دۆخەکە بگۆڕن.

 

نموونەیەکتان بۆ دەهێنمەوە.. زۆرجار دەڵێن ئەگەر ئێوە ناڕازین لەو حکومەتە بۆ نایەنە دەرەوە لەو حکومەتە؟ ئێمە گلەییمان هەیە لە حکومەت، بەڵام لە ژوورەوە دەتوانین شتەکان چاک بکەین، لە دەرەوە ناتوانین دۆخەکان چاک بکەین.. بۆیە داوا لە گەنجان دەکەم وەرن بۆ کۆمەڵەی خوێندکاران بەرنامەیەکی تازەمان هەیە بۆ ئەو رێکخراوە و ئینشەڵا بە جۆرێکی تازە زیندووی دەکەینەوە، بڕۆنە مەڵبەندەکان و کۆمیتەکانمان، قسە لەگەڵ برادەرەکانتان بکەن و بیانخەنە ناو یەکێتی ئینشەڵڵا دەتوانین بڕوا بە یەکتری بکەین کە بەیەکەوە دەتوانین دۆخی کوردستان بە تایبەت دۆخی گەنجان و ژنان باش بکەین.

 

 

بافڵ تاڵەبانی: ئەمە زۆر روونە لای من بۆ دۆخەکە وایە، من پێموایە زۆربەی خەڵکی کوردستان و هەموو حیزبەکان بێجگە رەنگە لە حیزبێک یان دوو حیزب رازی نەبن بە جۆری حکومڕانی لەو وڵاتە. با راشکاو بین لەگەڵ یەکدی، ئێمە وەکو یەکێتی ئەمڕۆ سیاسەتی خۆمانمان هەیە، پاشکۆی هیچ لایەنێک نابین، هیچ حیزبێک نابین و هیچ وڵاتێک نابین. ئێمە سیاسەتی خۆمانمان هەیە، هەڤاڵەکانمان بەجێ ناهێڵین، دانیشتن زۆر جیددیمان لەگەڵ هەموو حیزبەکان کردووە بە پارتی دیموکراتی کوردستانیەوە، توانیومانە تێبگەین کێشەکانمان لەو هەڵبژاردنە چییە؟ خۆشبەختانە زۆربەی حیزبەکانیش رایان وەکو ئێمەیە، رەنگە زووبێت بڵێم لەگەڵ ئێمەن، بەڵام من داوا لەو حیزبانە دەکەم لە یەکێتی نیشتمانی کوردستان تێبگەن، زۆر بە جیددیمانە ئێمە دەمانەوێت خزمەتی ئەو وڵاتە بکەین، ئێمە دەزانین لەبەر کێشەکانی نێوخۆمان هەڵەمان هەبووە، وەکو پێویست بۆ هەندێک بابەت کارمان نەکردووە، بەڵام دڵنیابن یەکێتی ئەمڕۆ ئەو یەکێتیەیە کە دێت کاری خۆی دەکات بۆ خەڵکی ئەم وڵاتە یەکەمجار ئینجا بۆ حیزبەکەی خۆی. بۆیە داوا لەو حیزبانە دەکەم ئەگەر بەو حکومڕانیە رازی نین، وەرن با چەترێک دروست بکەین بەیەکەوە، کارێکی وا بکەین کە لەو هەڵبژاردنە بتوانین گۆڕانکارییەکی راستەقینە بکەین لە حکومڕانی کوردستان.

 

 

بافڵ تاڵەبانی: ئەوەی کە من تێیگەیشتم لەو کۆبوونەوەیە دوو سێ شت بوو. یەکەمیان؛ نەتەوەیەکگرتووەکان زۆر نیگەرانبوو لەوەی لایەنە کوردییەکان لەگەڵ یەک قسە ناکەن، ئەوەی کە من تێیگەیشتم بە بیانووی هەڵبژاردن ئێمەیان کۆکردەوە، جا بزانن ئەوە چەند خراپە کە ئێمە پێویستمان بە نەتەوەیەکگرتووەکان هەیە بێن کوردەکان کۆبکەنەوە. بەڵام کە دانیشتین و قسەمان کرد باسی کێشەکانی هەڵبژاردنمان کرد. شتەکانی کە باسکران مەسەلەی کۆمیسیۆن بوو، بازنەکان، یاسای هەڵبژاردن، دابەشکردنی کورسییەکان، پرسی کەمینەکان و کۆتاکان بوو. پێموایە ئەمە یەکەمین کۆبوونەوە بوو دوایین کۆبوونەوە نابێت، پێشنیازکراوە 9ـی مانگ دانیشتنێکی دیکە بکەین. ئامانجی ئێمە ئەوەیە رایەکان لەیەک نزیک بکەینەوە، تاوەکو بتوانین گۆڕانکارییەکی جیددی بکەین لە یاسای هەڵبژاردن و کۆمیسیۆن و شتەکانی دیکەش، بۆ ئەوەی بە زووترین کات هەڵبژاردنێک بکەین کە باڵانسی هێز لە کوردستان راست بکەینەوە.