هەڵەیەک روویدا! دووبارە هەوڵبدە
رووداو دیجیتاڵ
لە نوێکردنەوەى تۆمارى دەنگدەرانى کۆمیسیۆنى هەڵبژاردنەکانى عێراق لە هەرێمى کوردستان پارێزگاى هەولێر لە پلەی یەکەم و پارێزگاى سلێمانى لە پلەى دووەم دێت، زیاتر لە 1300 ئاوارەش لە هەرێمى کوردستان تۆمارى دەنگدەرانیان نوێکردووەتەوە.
جومانە غلاى، گوتەبێژى کۆمیسیۆنى باڵاى سەربەخۆى هەڵبژاردنەکانى عێراق بە تۆڕى میدیایی رووداوى راگەیاند: "تاوەکو 26ى تەممووزى 2023 لە سنوورى پارێزگاى هەولێر 12 هەزار 996 کەس ناوى خۆیان نوێکردووەتەوە بە 699 دەنگدەرى کەمپى ئاوارەکانیشەوە. دوو هەزار و 691 کەس گۆڕانکاری و گواستنەوەى ناوەندى دەنگدانیان کردووە لەنێو خۆى پارێزگاکە و دەرەوەیدا. هەروەها 8730 کەس وەک دەنگدەرى نوێ ناوى خۆیان تۆمار کردووە.
53 ناوەندى تۆمارکردن لە سنوەرى پارێزگاى هەولێر هەیە و ژمارەى دەنگدەرانى یەک ملیۆن و 312 هەزار و 601 کەسە.
جومانە غلاى رایگەیاند، لە پارێزگاى دهۆک و 8372 کەس نوێکردنەوەی تۆمارى دەنگدەرانیان کردووە، کە 285 دەنگدەریان لە کەمپى ئاوارەکان بوون و ناوى هەشت دەنگدەر سڕدراونەتەوە، 7447 کەس وەک دەنگدەرى نوێ ناوى خۆیان تۆمارکردووە.
لە سنوورى پارێزگاى دهۆک 41 ناوەندی ناو تۆمارکردن هەن و ژمارەى دەنگدەرانى ئەو پارێزگایە 878 هەزار و 110 کەسە.
سەبارەت بە سنووری پارێزگای سلێمانیش، گوتەبێژى کۆمیسیۆنى باڵاى سەربەخۆى هەڵبژاردنەکانى عێراق ئاشکرایکرد، لە سنوورى پارێزگاى سلێمانى، 12 هەزار و 841 کەس تۆمارى دەنگدەرانیان نوێکردووەتەوە کە 319یان ئاوارەبوون و ناوى 29 کەس سڕدراونەتەوە و نۆ هەزار و 509 کەسى نوێ ناوى خۆیان تۆمار کردووە.
لە سنوورى پارێزگاى سلێمانى 79 ناوەندى نوێکردنەوەى تۆمارى دەنگدەران کراونەتەوە و ژمارەى دەنگدەرانى یەک ملیۆن و 441 هەزار و 855 کەسە.
لە 15ى تەممووزەوە کۆمیسیۆنى باڵاى سەربەخۆى ھەڵبژاردنەکانى عێراق ناوەندەکانى تۆمارى دەنگدەرانى لە هەرێمى کوردستان کردەوە وەک ئامادەکارییەک بۆ هەڵبژاردنى پەرلەمانى کوردستان، کە بڕیارە ئەو کۆمیسیۆنە سەرپەرشتی بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ