کۆمیسیۆن: دەنگدان و جیاکردنەوەی دەنگەکانی هەڵبژاردنی پەرلەمانی کوردستان هاوشێوەی عێراق دەبێت

 

 

رۆژی دووشەممە 28-08-2023 عیماد جەمیل، سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق، لەبارەی سیستمی دەنگدان و هەژمارکردنی دەنگەکان لە هەڵبژاردنی خولی شەشەمی پەرلەمانی کوردستان، بە تۆڕی میدیایی رووداوی راگەیاند، "ئەو میکانیزمانەی بۆ دەنگدان و جیاکردنەوەی دەنگەکان لەڕووی بەکارهێنانی ئامێر و بە دەستی لە هەڵبژاردنی 10ی ئۆکتۆبەری ساڵی 2021 پەیڕەومان کرد، هەمان میکانیزم و سیستم بۆ هەڵبژاردنی خولی شەشەمی پەرلەمانی کوردستان بەکاردەهێنین و دواتر وردەکاریی زیاتریش بڵاودەکەینەوە."

 

سەبارەت بە ئامادەکارییەکانیان بۆ هەڵبژاردنی خولی شەشەمی پەرلەمانی کوردستان گوتی، ئامادەکارییەکان لەڕووی ئامادەکردنی ئامێرەکان و هۆڵەکان و پشکنینی کۆگا و وردەکاریی دیکە دەستیانپێکردووە، "گرنگە دەنگدەران تۆماری خۆیان نوێ بکەنەوە، چونکە تاوەکو ئێستا  178 هەزار و 123 کەس تۆماری خۆیان نوێکردووەتەوە و ئومێد دەکەین لەو ماوەیەی تاوەکو 9ی ئەیلوول ماوە، خەڵکێکی زیاتر روو لە بنکەکانی دەنگدان بکەن بۆئەوەی تۆمارەکانیان نوێ بکەنەوە."

 

عیماد جەمیل ئاماری دەنگدەرانی هەرێمی کوردستانی ئاشکرا کرد و گوتی، "سێ ملیۆن و 641 هەزار و 566 دەنگدەرن."

 

بڕیارە هەڵبژاردنی داهاتووی پەرلەمانی کوردستان لەلایەن کۆمیسیۆنی هەڵبژاردنی عێراقەوە سەرپەرشتی بکرێت.

 

رۆژی 3ی ئابی 2023 دڵشاد شەهاب، گوتەبێژی سەرۆکایەتیی هەرێمی کوردستان رایگەیاند، دوای راوێژ و گفتوگۆ لەگەڵ سەرجەم لایەنە سیاسییەکانی هەرێمی کوردستان، سەرۆکی هەرێمی کوردستان بڕیاریدا بە دیاریکردنی 25ی شوباتی 2024 وەکو رۆژی بەڕێوەچوونی هەڵبژاردنی پەرلەمانی کوردستان.