لێدوانی دکتۆر کاروان نانەکەلی، بەڕێوەبەری نەخۆشخانەی فریاکەوتنی رۆژئاوای هەولێر بۆ رووداو
رووداو دیجیتاڵ
بەڕێوەبەری نەخۆشخانەی فریاکەوتنی رۆژئاوای هەولێر دەڵێت، دوو برینداری دیکەی هۆڵی ئاهەنگگێڕانەکەی حەمدانیە لە هەولێر گیانیان لەدەستدا.
رۆژی پێنجشەممە 28-09-2023، دکتۆر کاروان نانەکەلی، بەڕێوەبەری نەخۆشخانەی فریاکەوتنی رۆژئاوای هەولێر بە رووداوی راگەیاند، دوو لەو بریندارانەی لە قەزای حەمدانیەوە بۆ نەخۆشخانەکەیان گواسترابوونەوە، بەهۆی زۆری رێژەی سووتانیان کە سەرووی 90% بوو گیانیان لەدەستدا، یەکێکیان منداڵ بوو و ئەوی دیکە ئافرەت بوو.
شەوی سێشەممە 26-09-2023، هۆڵێکی ئاهەنگگێڕان لە قەزای حەمدانیە لە پارێزگای نەینەوا ئاگری گرت و بەهۆیەوە نزیکەی 100 کەس گیانیان لەدەستدا و زیاتر لە 150 کەسیش بریندار بوون.
بەڕێوەبەری ئێمێرجنسیی هەولێر: تەنیا 25 برینداری رووداوەکەی حەمدانیە لە نەخۆشخانەکەمان ماون
ئەمڕۆ پێنجشەممە 28-09-2023، رەوەند حەوێزی، بەڕێوەبەری نەخۆشخانەی ئیمێرجنسیی هەولێر بە رەنجە جەمال، پەیامنێری تۆڕی میدیایی رووداوی گوت، ئێستا تەنیا 25 برینداری رووداوەکەی حەمدانیە لەو نەخۆشخانەیە ماون، کە رێژەی سووتانەکەیان زۆرە و پێویستیان بە چارەسەر و خاوێنکردنەوەی برینەکانیان هەیە.
رەوەند حەوێزی ئاماژەی بەوە کرد، لەو 25 کەسە، تەنیا ئافرەتێک و پیاوێک لە چاودێریی چڕدا ماون، کە یەکێکیان 60٪ و ئەوەی دیکەشیان 40٪ی جەستەی سووتاوە و تەندروستییان ناجێگیرە.
بەگوتەی بەڕێوەبەری نەخۆشخانەی ئیمێرجنسیی هەولێر، لەکاتی رووداوەکەوە تائێستا 47 نەخۆش گواستراونەتەوە بۆ نەخۆشخانەکەیان کە 22 کەسیان چارەسەری پێویستیان بۆ کراوە و نێردراونەتەوە ماڵەوە.
رەوەند حەوێزی پێنج کەس لەوانەی لە نەخۆشخانەی ئیمێرجنسی خەوێندراون پیاون و ئەوانەی دیکە زیاتر ئافرەت و منداڵن، گوتیشی تەندروستیی منداڵەکان بەراورد بە ئافرەتان و پیاوەکان جێگیرترە.
ئێوارەی دوێنێ (چوارشەممە، 27-09-2023) نێچیرڤان بارزانی، سەرۆکی هەرێمی کوردستان لە نەخۆشخانەی ئیمێرجنسی لە هەولێر، سەردانی بریندارانی رووداوەکەی حەمدانیەی کرد، دواتر لە کۆنگرەیەکی رۆژنامەڤانیدا رایگەیاند، ئەوەی پێویستە لە هەرێمی کوردستان بۆ قوربانییانی رووداوەکە دەیکەن و گوتی، "ئێمە داوامان کرد کە دەبێت لێکۆڵینەوەیەکی جدی لەم مەسەلەیە بکرێت و دەبێ قوربانییانی رووداوەکە قەرەبوو بکرێنەوە.''
عەبدولئەمیر شەممەری، وەزیری ناوخۆی عێراق چووە شوێنی رووداوەکە و دواتر ئاشکرایکرد، دەزگە ئەمنییەکان 14 کەسیان دەستگیرکردووە، لەنێویاندا 10 کرێکار، خاوەنی هۆڵەکە و سێ کەسی دیکە کە بە گڕدانی یارییە ئاگرینەکان لە کاتی رووداوەکە تۆمەتبارن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ