رووداو دیجیتاڵ
دوای بڵاوبوونەوەی هەواڵی مووشەکبارانکردنی چەند بنکەیەک لە هەرێمی کوردستان، میدیای ئێران لە زاری سەرچاوەی ئاگادارەوە بڵاویانکردەوە، هەواڵەکە ناڕاستە و ئەو ڤیدیۆیانەی بڵاوکراونەتەوە کۆنن.
ئێوارەی رۆژی شەممە، 29-11-2025، لە ژمارەیەک ماڵپەڕ و کەناڵی تۆڕە کۆمەڵایەتییەکانی ئێران بڵاوکرایەوە، ئێران چەند بنکە و شوێنی "هێزە دژبەرەکان و ئیسرائیل"ی لە هەرێمی کوردستان مووشەکباران کردووە و چەند گرتەی ڤیدیۆییش بڵاوکرایەوە، بەڵام هەواڵەکە رەتکرایەوە.
ئێوارەی ئەمڕۆ شەممە، ئاژانسی تەسنیمی نزیک لە سوپای پاسداران لە زاری سەرچاوەی باڵای ئەمنی و سەربازییەوە رایگەیاند، ئەو هەواڵەی لەبارەی مووشەکبارانی هەرێمی کوردستان لەلایەن ئێرانەوە بڵاوکراوەتەوە راست نییە.
لە ساڵی 2018ـەوە ئێران چەندین جار بنکەی هێزەکانی رۆژهەڵاتی کوردستان لە خاکی هەرێمی کوردستان، بنکەی سەربازی و هەروەها خانووی نیشتەجێبوونی لەنێوشاری هەولێر مووشەکباران کردووە بە پاساوی بوونی بنکەی ئیسرائیل، بەڵام بەرپرسانی هەرێمی کوردستان رەتیدەکەنەوە، هیچ بنکە و بارەگایەکی ئیسرائیل و مۆساد لە هەرێمی کوردستاندا هەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ