رووداو دیجیتاڵ
لە پارێزگای لوڕستان 116 فرۆشیاری مادەی هۆشبەر دەستگیر کران کە 7ـیان گەورە بازرگانن. بەڕێوەبەری پۆلیسی پارێزگاکە دەڵێ، دەست بەسەر 251 کیلۆگرام مادەی هۆشبەریشدا گیراوە.
شەوی پێنجشەممە 29-01-2026، محەممەدڕەزا هاشمی فەر، بەڕێوەبەری پۆلیسی پارێزگای لوڕستانی رۆژهەڵاتی کوردستان رایگەیاند، لە چوارچێوەی بەرەنگاربوونەوە و نەهێشتنی مادە هۆشبەرەکان، ئۆپەراسیۆنێکی سێ رۆژەیان لە سەرانسەری پارێزگاکە بەڕێوەبردووە.
بەگوتەی محەممەدڕەزا هاشمی فەر، لە ئۆپەراسیۆنەکەدا دەستیان بەسەر 251 کیلۆگرام مادەی هۆشبەری جۆراوجۆردا گرتووە و 116 فرۆشیاری مادەکەش دەستگیر کراون کە حەوتیان گەورە بازرگانن.
بەڕێوەبەری پۆلیسی پارێزگای لوڕستان ئاماژەی بەوە کرد، پەیوەست بە دۆسیەکە دەست بەسەر 11 ئۆتۆمبێل و ماتۆرسکیلیشدا گیراوە کە بۆ گواستنەوەی مادەی هۆشبەر بەکارهێنراون.
هەر لە ئۆپەراسیۆنەکەدا 323 ئالوودەبووی مادەی هۆشبەریش لە سەرانسەری پارێزگای لوڕستان کۆکراونەتەوە و رەوانەی ناوەندەکانی شیاندنەوە کراون.
پارێزگای لوڕستان بەهۆی هاوسنووربوونی لەگەڵ پێنج پارێزگای خوزستان، چوارمەحاڵ و بەختیاری، مەرکەزی، هەمەدان و ئیسفەهانی ئێران، هەروەها دوو پارێزگای کرماشان و ئیلامی رۆژهەڵاتی کوردستان، وەکو ترانزێت بۆ گواستنەوەی مادەی هۆشبەر چی بۆ دەرەوە و چی بۆ نێوخۆی ئێران و رۆژهەڵاتی کوردستان بەکاردەهێندرێت.
بەگوێرەی ئاماری بەڕێوەبەرایەتیی نەهێشتنی مادەهۆشبەرەکانی لوڕستان، لە 21-03-2025ـوە تاوەکو 21-09-2025، لە سنووری پارێزگاکە دەست بەسەر 66 تۆن و 500 کیلۆگرام مادەی هۆشبەری جۆراوجۆردا گیراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ