رووداو دیجیتاڵ
کۆماری یەمەن بە تووندی سەرکۆنەی هێرشەکانی ئەم دواییەی ئێران دەکات بۆ سەر خاکی کوێت و هەرێمی کوردستان و رایدەگەیێنێت، ئەم هێرشانە پێشێلکاریی ئاشکرای سەروەریی وڵاتان و هەڕەشەیەکی جیدییە بۆ سەر ئاسایشی ناوچەکە.
رۆژی دووشەممە، 30ی ئاداری 2026، وەزارەتی دەرەوەی یەمەن رایگەیاند، ئەو هێرشانەی ئێران کە کرانە سەر دامەزراوە مەدەنی و سەربازییەکانی کوێت و بوونە هۆی برینداربوونی ژمارەیەک لە کارمەندانی هێزە چەکدارەکانی ئەو وڵاتە، "بەزاندنی هەموو سنوورەکانە."
وەزارەتی دەرەوەی یەمەن لە بەشێکی دیکەی راگەیێندراوەکەدا، ئاماژەی بە هێرشەکانی سەر هەرێمی کوردستان کردووە و دەڵێت: "سەرکۆنەی ئەو هێرشانە دەکەین شوێنی نیشتەجێبوونی ژمارەیەک لە سەرکردە سیاسییەکانیان لە هەرێمی کوردستانی کردە ئامانج، ئەمە پێشێلکردنی سەروەریی کۆماری عێراق و تێکدانی ئاسایش و سەقامگیریی ناوچەکەیە."
یەمەن هاوسۆزیی تەواوی خۆی بۆ دەوڵەتی کوێت و کۆماری عێراق و هەرێمی کوردستان دەربڕیوە و پشتگیریی خۆی بۆ هەر رێکارێک دووپاتکردەوە کە ئەو وڵاتانە بۆ پاراستنی خاک و ئاسایشی خۆیان دەیگرنەبەر. هەروەها ستایشی ئامادەباشی و لێهاتوویی هێزە چەکدارەکانی کوێتی کردووە لە بەرپەرچدانەوەی هێرشەکاندا.
لە کۆتایی راگەیێندراوەکەدا، وەزارەتی دەرەوەی یەمەن داوای لە کۆمەڵگەی نێودەوڵەتی و بە تایبەت ئەنجوومەنی ئاسایشی نەتەوە یەکگرتووەکان کردووە، هەڵوێستێکی تووند و یەکلاکەرەوەیان هەبێت بۆ رێگریکردن لەو هێرشانە و گوشار خستنە سەر ئێران بۆ راگرتنی ئەو رەفتارانەی کە دەبنە هۆی تێکدانی سەقامگیری و بەرژەوەندییەکانی گەلانی ناوچەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ