رووداو دیجیتاڵ
مێرمنداڵێک لەکاتی هەڵواسینی پۆستەری هەڵبژاردن ئۆتۆمبێلێکی بارهەڵگر لێی دەدات و بەهۆیەوە ئەمڕۆ گیانی لەدەستدا.
رووداوەکە شەوی هەینی 27-09-2024 لە هەولێر روویداوە، مێرمنداڵەکە لەگەڵ براکەی لەنێو بەرزکەرەوەیەک بوون بۆ هەڵواسینی پۆستەری بانگەشەی هەڵبژاردن، بەڵام بارهەڵگرێک لە بەرزکەرەوەکە دەدات و دەکەونە خوارەوە، یەکێک لە براکان قاچی دەشکێت و ئەوەی دیکە بە سەختی بریندار دەبێت و بێهۆش دەکەوێت.
بەپێی ئەو زانیارییانەی رووداو لە سەرچاوەیەکی نێو یەکێتیی نیشتمانیی کوردستانەوە دەستیکەوتوون، مێرمنداڵەکە پۆستەری بانگەشەی بۆ بەربژێرانی یەکێتی هەڵواسیوە و دوای گەیاندنی بە نەخۆشخانە، بەیانیی ئەمڕۆ (دووشەممە، 30-9-2024) کۆچی دوایی کردووە.
شۆفێری ئەو بارهەڵگرەی لێیداوە بە رەچەڵەک عەرەبە. مێرمنداڵەکەش ناوی ئەحمەد ئیسماعیلە و دانیشتووی کۆمەڵگەی پیرزین بووە لە هەولێر.
لە 25ـی ئەیلوولەوە بانگەشەی هەڵبژاردنی خولی شەشەمی پەرلەمانی کوردستان دەستیپێکردووە، ئەمە یەکەم رووداوی گیانلەدەستدانە لەو هەڵمەتەدا.
بەپێی بڕیاری کۆمیسیۆن، بانگەشەی هەڵبژاردن تاوەکو 12:00ـی شەوی 15ـی مانگی تشرینی یەکەم بەردەوام دەبێت. رۆژی 18ـی مانگ دەنگدانی تایبەت بەڕێوەدەچێت و لە 20ـی مانگیش دەنگدانی گشتی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ