رووداو دیجیتاڵ
دژەتیرۆری کوردستان رەتی دەکاتەوە، ئەمڕۆ هێرش کرابێتە سەر فڕۆکەخانەی نێودەوڵەتیی هەولێر.
ئەمڕۆ چوارشەممە، 31-1-2024، دژە تیرۆری کوردستان راگەیێندراوێکی بڵاوکردەوە و تێیدا هاتووە، ئەمڕۆ لە ژمارەیەک میدیا و کەناڵ هەواڵێکی لەو جۆرە بڵاوکرایەوە کە گوایە بە درۆنی بۆمبڕێژکراو هێرشکراوەتە سەر فڕۆکەخانەی نێودەوڵەتیی هەولێر.
دژە تیرۆری کوردستان ئاماژە بەوە دەکات، ئەو هەواڵە راست نییە و هیچ هێرشێک نەکراوەتە سەر فڕۆکەخانەی نێودەوڵەتیی هەولێر.
لە 17-10-2023ـەوە گرووپە چەکدارەکانی عێراق نزیک لە ئێران کە خۆیان بە "موقاوەمەی ئیسلامی" لە عێراق ناودەبەن، دەستیان بە هێرشکردنە سەر بنکەکانی ئەمریکا لە هەرێمی کوردستان، رۆژئاوای کوردستان، عێراق و سووریا کردووە و دەڵێن، ئەو کارەیان لە بەرامبەر پاڵپشتیکردنی ئەمریکایە لە ئیسرائیل لەو جەنگەی لەگەڵ حەماس هەیەتی.
بە گوێرەی وەزارەتی بەرگریی ئەمریکا - پێنتاگۆن، لە 17ـی تشرینی یەکەمی ساڵی رابردووەوە 165 جار هێرشکراوەتە سەر هێزەکانی ئەمریکا لە هەرێمی کوردستان، رۆژئاوای کوردستان عێراق و سووریا.
بەرەبەیانیی رۆژی یەکشەممەش هێرشکرایە سەر بنکەیەکی سوپای ئەمریکا لە ئوردن و لەئەنجامدا سێ سەرباز کوژران و نزیکەی 40 سەربازی دیکەش برینداربوون.
لەو رۆژەوە جۆ بایدن چەند جارێک رایگەیاندووە، وەڵامیان بۆ ئەو هێرشە دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ