رووداو دیجیتاڵ
بەڕێوەبەرایەتیی ئاوی ئێران دەڵێ، چوار بەنداو بە تەواوی وشک بوون و 9 بەنداوی دیکەش کەمتر لە 10% ئاویان تێدا ماوە.
بەڕێوەبەرایەتیی ئاوی ئێران بڵاویکردەوە، بەنداوەکانی وشمگیر و بوستان لە پارێزگای گوڵستان، بەنداوی شیمیل و نیان لە پارێزگای هورموزگان و بەنداوی رودبال لە پارێزگای فارس بە تەواوی وشک بوون و ئاویان تێدا نەماوە.
بە گوێرەی بەڕێوەبەرایەتییەکە، لانیکەم لە 9 بەنداوی دیکە لە پارێزگاکانی تاران، خوراسانی رەزەوی، قوم، هورموزگان، گیلان، کرمان و مەرکەزی دۆخەکە مەترسیدارە و کەمتر لە 10% ئاویان هەیە.
بەڕێوەبەرایەتیی ئاوی ئێران دەڵێ، بەنداوی لار لە تاران تەنیا 5% ئاوی تێدا ماوە، بەنداوەکانی دوستی و توروق لە خوراسانی رەزەوی تەنیا 5% و 6%، بەنداوی 15ی خورداد لە قوم 8%، بەنداوی ئیستقلال لە هورموزگان 3%، بەنداوی سفیدرود لە گیلان 4%، بەنداوی ساوە لە پارێزگای مەرکەزی 7% و بەنداوەکانی تەنگوئیەی سیرجان و نسا لە کرمان تەنیا 7% و 8% ئاویان تێدا ماوە.
بەڕێوەبەرایەتییەکە دەڵێ، قەبارەی ئاوی گلدراوە لە بەنداوەکانی سەرانسەری ئێران بۆ 41% دابەزیوە، بەو پێیە ئێستا ئاوی گلدراوی بەنداوەکان 21 ملیار مەتر سێجایە کە بەراورد بە پار کە زیاتر لە 28 ملیار مەتر سێجا بوو، بە رێژەی 25% کەمبووەتەوە.
بەڕێوەبەرایەتییەکە ئاماژەی بە بڕی بارین لە ئێران کردووە و رایگەیاندووە، ئەم ساڵ تێکرای بارینی باران لەو وڵاتە 147.7 ملیمەتر بووە، ئەوەش بەراورد بە وەرزی بارینی رابردوو کە 247.9 ملیمەتر بوو، بە رێژەی 40% کەمترە.
بەپێی بەڕێوەبەرایەتییەکە، ئەم ساڵ تەنیا لە پارێزگای گیلان بارینی بەفر و باران لە ئاستێکی ئاساییدا بووە و لە پارێزگاکانی سیستان و بەلوچستان، هورموزگان، بووشێهر و خوزستان کەمترین رێژەی بارین تۆمارکراوە.
ئەم ساڵ ئێران رووبەڕووی کێشەیەکی گەورەی کەمئاوی بووەتەوە و بە تایبەت دۆخەکە لە تاران سەختترە، لەبەر ئەوەی چوار بەنداوی سەرەکیی پارێزگاکە تەنیا 12% ئاویان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ