رووداو دیجیتاڵ
دیاردەی "هاوژینیی سپی" (White Marriage) لە ماوەی چەند ساڵی رابردوودا لە ئێران بووەتە بابەتێکی گەرمی میدیا و کۆمەڵگە، کە ئاماژەیە بۆ ژیانی پیاو و ژنێک پێکەوە بەبێ ئەوەی بە فەرمی مارە ببڕێن یان گرێبەستی هاوسەرگیری بکەن. سەرەڕای نەبوونی ئاماری فەرمی، شارەزایان هۆشداری دەدەن لەبارەی مەترسییە یاسایی و کۆمەڵایەتییەکانی ئەم جۆرە پەیوەندییە، کە بە یاساکانی ئێران بە تاوان دادەنرێت.
کێشە یاسایی و شەرعییەکان
ئەم جۆرە ژیانە پێکەوەییە بە تایبەت لە شارە گەورەکانی ئێران پەرەی سەندووە و سەرەڕای ئەوەی هەندێک لە کۆمەڵگە بە شێوەیەکی هەڵە وادەزانن لە چوارچێوەی "مارەبڕینی کاتی" شەرعی دایە، بەڵام پسپۆڕانی یاسایی ئەم بۆچوونە رەت دەکەنەوە.
مریەم حوسێنی، پارێزەر، لەوبارەیەوە دەڵێت: "بەداخەوە تێگەیشتنێکی هەڵە لە کۆمەڵگەی ئێران هەیە کە پێیانوایە ئەم هاوژینییە سپییە لە چوارچێوەی هاوسەرگیرییەکی شەرعیدایە، بەڵام وانییە. ئێمە دەبینین کە ئەم جۆرە پەیوەندییە تۆمار نەکراوە و لەڕووی یاساییەوە رێگەپێدراو نییە، نە بنەمایەکی شەرعی هەیە، تەنانەت لە یاساکانی ئێراندا بە تاوان دادەنرێت."
زیانە کۆمەڵایەتی و دەروونییەکان
بەشێک لە بەرپرسان و کۆمەڵناسانی ئێرانی پێیانوایە، دیاردەکە بەهۆی چەند هۆکارێکی جیاوازەوە لەم ساڵانەی دواییدا زیادی کردووە و لێکەوتەی نەرێنی لەسەر تاک و خێزان و کۆمەڵگە دروست دەکات.
د. یوسف خانی، راوێژکاری خێزان و پسپۆڕ لە بواری زیانە کۆمەڵایەتییەکان لە سنە، جەخت لەسەر کاریگەرییەکان دەکاتەوە و دەڵێت: "لێکەوتەی نەرێنی هەیە، لێکەوتەی لەسەر کەسەکان، خێزانەکان، کۆمەڵگە و هەروەها لێکەوتەی یاسایی هەیە. لەسەر ئاستی کەسی، نائەمنی سۆزداری و دەروونی لێدەکەوێتەوە. زیان بە متمانەبەخۆبوون و شکۆی مرۆڤەکان دەگەیەنێت، زیانی سێکسی و جەستەییش لێدەکەوێتەوە. لە بابەتی خێزان دا، دەبێتە هۆی لاوازبوونی بنیاتی خێزان، چونکە بەڕاستی خێزان لاواز دەکات و لەنێو دەبات."
هۆکارەکانی زیادبوون
خراپی دۆخی ئابووریی ئێران، کاریگەریی تەکنەلۆژیا و گۆڕانکارییە کولتوورییەکانی نەوەی نوێ بە هۆکاری سەرەکی دروستبوونی ئەم جۆرە پەیوەندییە لە شارە گەورەکان دادەنرێن.
حیسام مەعروفزادە، راوێژکاری خێزان و هاوسەرگیری، هۆکارەکان دەخاتەڕوو: "تێچووی زۆر لە هاوسەرگیریی فەرمیدا، هەروەها رێوڕەسمە جیاوازەکانی بنەماڵەکان و روانینێکی نەریتی بووەتە هۆی ئەوەی کە لاوان دڵسارد ببنەوە لە هاوسەرگیریی فەرمی. دووەمین هۆکار، روودانی گۆڕانکاری لە بیر و بڕوایە. دەستڕاگەیشتنی گەنجان بە تۆڕە کۆمەڵایەتییەکان و دیتنی ژیانی خەڵکی وڵاتانی دیکە بووەتە هۆی گۆڕینی بڕوا و روانینیان."
زیادبوونی ئەم دیاردەیە لە کاتێکدایە کە بەپێی ئامارە فەرمییەکان، 17 ملیۆن کەس لە ئێران کە تەمەنیان لە خوار 45 ساڵانە، بەهۆکاری جیا هاوسەرگیرییان نەکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ