رووداو دیجیتاڵ
سەرۆککۆماری نوێی ئێران لەبارەی کوژرانی ئیسماعیل هەنییە، سەرۆکی مەکتەبی سیاسیی بزووتنەوەی حەماس لە تاران رایگەیاند، کۆماری ئیسلامیی ئێران داکۆکی لە یەکپارچەیی خاکی خۆی دەکات و "داگیرکەرانی تێرۆریستیش لە کارە ترسنۆکەکانیان" پەشیمان دەکاتەوە.
ئەمڕۆ چوارشەممە، مەسعود پزیشکیان پەیامێکی لە تۆڕی کۆمەڵایەتیی ئێکس بڵاوکردەوە: "ئەمڕۆ ئێرانی ئازیز، هاوەڵی هەمێشەیی و سەربەرزی رێبازی خۆڕاگری، سەرکردەی ئازای بەرخۆدانی فەلەستین، شەهیدی قودس، حاج ئیسماعیل هەنییە، ماتەمینی دەگێڕێت. دوێنێ دەستی سەرکەوتووی ئەوم بەرزکردەوە و ئەمڕۆ دەبێ لەسەر شانەکانم هەڵیگرم بۆ ناشتنی."
مەسعود پزیشکیان دەڵێت، "شەهیدبوون هونەری پیاوانی خودایە. پەیوەندیی نێوان دوو گەلی سەربەرزی ئێران و فەلەستین لە جاران بەهێزتر دەبێت و رێگەی خۆڕاگری و بەرگری لە ستەملێکراوان لە هەموو کاتێک بەهێزتر پەیڕەو دەکرێت."
دەشڵێت، "کۆماری ئیسلامیی ئێران داکۆکی لە یەکپارچەیی خاکی خۆی، شکۆ، شانازی و شەرەفی دەکات و داگیرکەرانی تیرۆریستیش لە کارە ترسنۆکەکانیان پەشیمان دەکاتەوە."
سەرۆککۆماری نوێی ئێران بە بەشێکی ئایەتێکی قورئان کۆتایی بە پەیامەکەی هێناوەتەوە و نووسێویەتی: «إِنَّ اللَّهَ عَزِيزٌ ذُو انْتِقَامٍ».
تاوەکو ئێستا ئێران بە فەرمی هیچ وردەکارییەکی لەبارەی کوشتنی هەنییە بڵاونەکردووەتەوە و تەنیا رایگەیاندووە، شوێنی مانەوەی لە تاران کراوەتە ئامانج و لە ئەنجامدا خۆی و پاسەوانێکی کوژراون.
هەنییە بۆ بەشداریکردن لە رێوڕەسمی سوێندخواردن و دەستبەکاربوونی مەسعود پزیشکیان، سەرۆککۆماری ئێران لە تاران بوو.
ئاژانسی فارس نیوزی سەر بە سوپای پاسداران دەڵێت: ئیسماعیل هەنییە کە بۆ بەشداریکردن لە رێوڕەسمی سوێندخواردن و دەستبەکاربوونی مەسعود پزیشکیان، سەرۆککۆماری نوێی ئێران لە تاران بوو و لە یەکێک لەو شوێنانەی تایبەتە بە بریندارانی شەڕ لە باکووری تاران دەمایەوە، نزیکەی کاژێر 2ی بەرەبەیانی چوارشەممە بەهۆی بەئامانجگرتنی بە موشەکێک لە ئاسمانەوە تیرۆرکراوە.
سوپای پاسداران رایگەیاندووە، لێکۆڵینەوەیان دەستپێکردووە و دواتر ئەنجامەکەی ئاشکرا دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ