رووداو دیجیتاڵ
بەڕێوەبەری دەستەی گومرگەکانی عێراق دەڵێ، گفتوگۆیان لەگەڵ هەرێمی کوردستان بۆ یەکخستنی سیستمی گومرگی ئەسیکۆدا بەردەوامە و ئاماژە بەوە دەکات، هەرچەندە هێشتا هەنگاوی کردەیی نەنراوە، بەڵام ئاسۆی رێککەوتن دیارە.
سامر قاسم داود، بەڕێوەبەری گشتیی دەستەی گومرگەکانی عێراق، رۆژی یەکشەممە 5ی نیسانی 2026، بە تۆڕی میدیایی رووداوی راگەیاند: "گفتوگۆمان لەگەڵ هەرێمی کوردستان لەبارەی سیستمی ئەسیکۆدا بەردەوامە. تاوەکو ئێستا هەنگاوی کردەیی 100٪ نییە، بەڵام هاوئاهەنگی و کۆبوونەوەکان بەردەوامییان هەیە".
سەبارەت بەو هەوڵانە، بەڕێوەبەری گشتیی دەستەی گومرگەکانی عێراق گوتی: "ئەو گفتوگۆیانە بە رێنمایی سەرۆکوەزیرانی عێراق لەگەڵ حکومەتی هەرێمی کوردستان بەڕێوەدەچن."
لەبارەی کاری لیژنە هاوبەشەکان بۆ یەکخستنی سیستمی گومرگی، سامر قاسم گوتی: "لیژنە هاوبەشەکان لە کارەکانیان بەردەوامن. ئاسۆ هەیە بۆ گەیشتن بە رێککەوتن، بەڵام ئێستا شتێکی کرداری نییە و تەنیا دیدار و کۆبوونەوە بەڕێوەدەچێ."
سیستمی ئەسیکۆدا، سیستمێکی جیهانیی ئەلیکترۆنییە بۆ بەڕێوەبردنی کاروباری گومرگی کە لەلایەن نەتەوە یەکگرتووەکانەوە پەرەی پێدراوە. عێراق ماوەیەکە کار بۆ جێبەجێکردنی دەکات و دەیەوێ لەگەڵ هەرێمی کوردستانیش بەیەکەوە کار بەو سیستمە بکەن.
سەرچاوەیەکی ئاگادار بە تۆڕی میدیایی رووداوی راگەیاند: "بڕیارە ئەمڕۆ شاندێکی حکومەت بچێتە بەغدا و لەبارەی سیستمی ئەسیکۆدا گفتوگۆ بکات."
17ـی ئاداری 2026، مەسرور بارزانی، سەرۆکی حکومەتی هەرێمی کوردستان لە کۆنفرانسێکی رۆژنامەڤانیدا لەبارەی سیستمی ئەسیکۆدا بە رووداوی گوت: "ئەوەی لەسەر هەرێمی کوردستان پێویستە ئێمە رەزامەندییمان دەربڕیوە و رازیش بووین بەوەی کە سیستمەکە لە هەرێمی کوردستان جێگیر بکرێت، بەڵام میکانیزمی جێبەجێکردنەکەی دەبێت بە رێگەی دامەزراوەکانی هەرێمی کوردستانەوە بێت، ئەمە کاتی دەوێ."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ