رووداو دیجیتاڵ
بەڕێوەبەرایەتیی بەرگریی شارستانیی عێراق دەست بە بەکارهێنانی ئامێری ئەلیکترۆنی (تابلێت) دەکات بۆ دیاریکردنی شوێنی ئاگرکەوتنەوەکان، کە لە رێگەی زانیاری و ژمارەی تەلەفۆنی ئەو کەسەی هەواڵ دەدات، شوێنەکە دەستنیشان دەکات.
نواس سەباح، گوتەبێژی بەڕێوەبەرایەتیی بەرگریی شارستانیی عێراق، ئەمڕۆ چوارشەممە، 5ی تشرینی دووەمی 2025، بە تۆڕی میدیایی رووداوی راگەیاند، "ئەو ئامێرانە نزیکترین و خێراترین رێگە بۆ گەیشتنی تیمەکانی بەرگریی شارستانی دیاری دەکەن، ئەمەش وادەکات کاتی گەیشتن بە شوێنی رووداوەکەکەمبێتەوە و بەهاناوەچوون خێراتر بێت، بەتایبەتی لە رووداوەکانی ئاگرکەوتنەوەدا."
بە گوتەی گوتەبێژی بەرگریی شارستانیی عێراق، "ئەم پرۆسەیە لە هەموو پارێزگاکانی عێراق خراوەتە واری جێبەجێکردنەوە و ئێستا کاری پێدەکرێت."
نواس سەباح گوتیشی، "ئەم هەنگاوە لە چوارچێوەی هەوڵەکاندایە بۆ کەمکردنەوەی زیانی رووداوەکان بۆ کەمترین ئاست و بە هاوئاهەنگی لەگەڵ بەڕێوەبەرایەتیی وەڵامدانەوەی 911 لە وەزارەتی ناوخۆ ئەنجام دەدرێت."
بەگوێرەی راگەیێندراوی بەڕێوەبەرایەتیی بەرگریی شارستانیی عێراق، دوو هێلیکۆپتەری تایبەت بە ئاگرکوژاندنەوە و فریاگوزاری لە بەغدا و بەسرە بۆ ناوچەکانی باکوور و باشووری ئەو دوو پارێزگایە تەرخانکراون.
نواس سەباح رایگەیاند، "هێلیکۆپتەرە نوێیەکان توانای هەڵگرتنی 3000 لیتر ئاو و 500 لیتر کەفی ئاگرکوژێنەوەیان هەیە."
بە گوێرەی ئاماری بەڕێوەبەرایەتیی بەرگریی شارستانیی عێراق، لە ساڵی 2022دا 32 هەزار و 477 رووداوی ئاگرکەوتنەوە لە عێراق تۆمارکراون؛ ژمارەکە لە ساڵی 2023دا 21 هەزار و لە ساڵی 2024 و نیوەی ساڵی 2025دا زیاتر لە 8 هەزار و 550 رووداو بوون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ