رووداو- هەولێر
جێگری پارێزگاری کەربەلا ژمارەی زیارەتکارانی رێوڕەسمی عاشوورای لە پارێزگاکە راگەیاند و دەڵێت، زیاتر لە 17 هەزار کەسی بیانی لەڕێگەی فڕۆکەخانەکانەوە و بۆ ئەو مەبەستە چوونەتە عێراق.
ئێوارەی رۆژی سێشەممە 9-8-2022، عەلی مەیالی، جێگری پارێزگاری کەربەلا رایگەیاند، ژمارەی زیارەتکاران لە رێوڕەسمی عاشووردا لە کەربەلا گەیشتووەتە زیاتر لە شەش ملیۆن کەس و لە کاژێرەکانی داهاتووشدا ئاماری ورد لەو بارەوە رادەگەیێنن.
جێگری پارێزگاری کەربەلا دەڵێت، هێزە ئەمنییەکان زیاتر لە 20 کامێرای گەرمیبینیان لە پارێزگاکەدا داناوە و ئاماژەی بەوەش کرد کە هیچ رووداو و پێشێلکردنێکی ئەمنی رووینەداوە.
هاوکات دەسەڵاتی فڕۆکەوانیی مەدەنی بڵاویکردەوە، بۆ بەشداریکردن لە رێوڕەسمی عاشوورادا زیاتر لە 17 هەزار کەسی بیانی چوونەتە نێو وڵات و 12 هەزار و 150 کەسیان لە فڕۆکەخانەی نەجەف و پێنج هەزار و 500 کەسیشیان لە فڕۆکەخانەی بەغداوە دابەزیوون.
عاشوورا دەیەم رۆژی مانگی موحەڕەمە لە ساڵی کۆچیدا. بە گوێرەی تۆمارە مێژووییەکان، لە ساڵی 61ی کۆچیدا حوسێنی کوڕی عەلی و ژمارەیەک لە کەسوکار و یاوەرانی لە شەڕی کەربەلا کوژران، بۆیە ئەو رۆژە رۆژی شین و ماتەمگێڕانە لای پەیڕەوانی شیعە مەزهەب و ساڵانە یادی دەکەنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ