هەڵەیەک روویدا! دووبارە هەوڵبدە
رووداو دیجیتاڵ
حکومەتی عێراق لە رێگەی "لیژنەی باڵای پەرەپێدانی خوێندن"ەوە گەڕێکی نوێی زەمالەی خوێندنی بۆ دەرەوەی وڵات راگەیاندووە کە 1000 کورسی بۆ خوێندنی ماستەر و دکتۆرا لە ژمارەیەک لە زانکۆکانی جیهان لەخۆدەگرێ. ستەم کامیل، خوێندکاری دکتۆرا لە زانکۆی شاهانەی بەریتانیا دەڵێ، ئەمە "دەرفەتێکی مێژوویی و یەکسانە" بۆ گەنجانی باشووری کوردستان و عێراق تاوەکو لەسەر بنەمای لێهاتوویی، بگەنە ناوەندە زانستییە جیهانییەکان.
دەرفەتەکە کێ دەگرێتەوە؟
بەشێکی سەرەکی پرۆژەکە بۆ فەرمانبەرانی هەمیشەیی دامودەزگاکانی حکومەت و مامۆستایانی زانکۆ حکومییەکانە، بەڵام گۆڕانکارییە هەرە گرنگەکە ئەوەیە کە لەم ساڵدا 5٪ی کورسییەکانی ماستەر بۆ ئەو گەنجە دەرچووانە تەرخانکراوە کە تاوەکو ئێستا دانەمەزراون.
مەرجەکان
بۆ ئەوەی هاونیشتمانی و هاووڵاتی بتوانێت پێشکێشی بکات، پێویستە پابەندی ئەم مەرجانە بێت:
بۆ خوێندنی دکتۆرا: تەمەنی پێشکێشکار نابێت لە 40 ساڵ زیاتر بێت.
بۆ خوێندنی ماستەر: تەمەنی پێشکەشکار نابێت لە 33 ساڵ زیاتر بێت.
توانستی زمان: بەربژێر دەبێت نمرەی پێویستی لە تاقیکردنەوە نێودەوڵەتییەکانی وەک (IELTS, PTE, TOEFL) هەبێت.
بەبێ "واستە" و دەستوەردانی حیزبی
یەکێک لەو خاڵانەی کە ستەم کامیل وەک سوودمەندێکی پێشتری پڕۆژەکە جەختی لێکردەوە، شەفافیەتی پڕۆسەکەیە و گوتی، "سیستمەکە بە تەواوی ئەلیکترۆنییە و تەنیا نمرەی زانکۆ، ئاستی زمانی ئینگلیزی و لێهاتوویی کەسی لە چاوپێکەوتندا بڕیار لەسەر کاندیدەکان دەدەن."
ئەو هاونیشتمانییە ئاماژەی بەوە دا کە تاوەکو ئێستا زیاتر لە 200 هاونیشتمانی لە هەرێمی کوردستان بەبێ هیچ جیاکارییەک وەرگیراون و ئێستا لە وڵاتانی دەرەوە دەخوێنن.
شێوازی پێشکێشکردن چۆنە؟
پڕۆسەی پێشکەشکردن لە 15ی شوباتەوە دەستیپێکردووە و دەرگای وەرگرتن تاوەکو 31ی ئاداری 2026 بە کراوەیی دەمێنێتەوە. هەر بەربژێرێک کە لەلایەن لیژنەکەوە هەڵدەبژێردرێ، ماوەی 2 ساڵ کاتی دەبێت بۆ ئەوەی قبووڵکردن لە زانکۆیەکی باوەڕپێکراوی نێودەوڵەتی بەدەستبهێنێت.
خزمەتگوزاریی پۆرتاڵی ئور (UR)
حکومەتی عێراق بۆ ئاسانکاریی گەنجان، پلاتفۆرمی ئەلیکترۆنیی (https://hced.ur.gov.iq/apply) تەرخان کردووە. پێشکەشکاران دەتوانن لە رێگەی ئەم لینکەوە فۆرمەکە پڕبکەنەوە و سەرجەم بەڵگەنامەکانیان بە دیجیتاڵی بنێرن، بەبێ ئەوەی پێویست بکات سەردانی بەغدا بکەن.
ئەم بەرنامەیە راستەوخۆ لەژێر چاودێریی نووسینگەی سەرۆکوەزیرانی عێراقدایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ