رووداو دیجیتاڵ
موقتەدا سەدر پەیوەندی بە هێزە ئەمنییەکانی عێراقەوە لە سنووری سووریا دەکات و داوایان لێدەکات لە "بەرزترین ئاستی وریایی و ئامادەیی" دا بن بۆ رێگری لە هەر دزەپێکردنێک.
ئەمڕۆ سێشەممە، نووسینگەی تایبەتی موقتەدا سەدر، رێبەری رەوتی نیشتمانیی شیعە راگەیێندراوێکی بڵاوکردەوە و تێیدا هاتووە: "بە مەبەستی دڵنیابوون لە ئاستی ئامادەیی هێزە پاڵەوانەکانمان لە سایەی ئەو گۆڕانکارییە مەترسیدارانەی ناوچەکە بەخۆیەوە دەیبینێت، بەڕێز موقتەدا سەدر پەیوەندییەکی راستەوخۆی بە هێزە ئەمنییەکان و یەکە سەربازییە جێگیرکراوەکانی سەر سنووری عێراق - سووریاوە کرد."
بەگوێرەی راگەیێندراوەکە، سەدر هانی هێزەکانی داوە "لە بەرزترین ئاستی وریایی و ئامادەییدا بن لە رێگەی بەگەڕخستنی هەموو توانایەکی سەربازی، تەکنیکی و ئەمنی بۆ پاراستنی سنوورەکان لە هەر دزەپێکردنێک."
بەگوێرەی نووسینگەکەی، لە پەیوەندییەکەدا رێبەری رەوتی نیشتمانیی شیعە "ئامادەیی تەواوی خۆی بۆ هەر پاڵپشتییەکی پێویست لەو پێناوەدا" دەربڕیوە.
لەدوای رووداوەکانی ئەم دواییەی سووریا و هێرشی سوپای عەرەبیی سووریا بۆ سەر ناوچەکانی رۆژئاوای کوردستان، ئەمە سێیەم جارە موقتەدا سەدر پەیام لەبارەی مەترسییەکانی ئەو رووداوانە بۆ سەر عێراق بڵاودەکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ