دیمەنی ساتی بۆردوومانێکی ناوچەیەکی حەلەب
رووداو دیجیتاڵ
رۆژنامەڤانێک رەتیدەکاتەوە سوپای عەرەبیی سووریا گەڕەکی شێخ مەقسوودی حەلەبی کۆنترۆڵ کردبێ و دەڵێت، ''شەڕڤانانی ئاسایشی ناوخۆ بە تووندی بەرگری دەکەن.''
ئەمڕۆ شەممە 10-01-2026 رۆژنامەڤانێک بەناوی (هۆزان) لە گەڕەکی شێخ مەقسوودی حەلەب، لەکاتی بەشداریکردنی لە بووڵتەنی کاژێر 11:00ی تۆڕی میدیایی رووداو کە هیڤیدار زانا پێشکێشی کرد، لەبارەی دەنگۆی کۆنترۆڵکردنی گەڕەکەکە لەلایەن سوپای عەرەبیی سووریاوە رایگەیاند، ''تاوەکو ئێستا شەڕ بەردەوامە و گەڕەکەکە کۆنترۆڵ نەکراوە.''
بە گوتەی هۆزان، هێزەکانی ئاسایشی ناوخۆ (سەر بە بەڕێوەبەرایەتیی خۆسەر) لە بەرگریکردن بەردەوامن و ''بە تووندی'' وەڵامی هێرشەکان دەدەنەوە.
ئەو رۆژنامەڤانە لەکاتێکدا کە دەنگی تەقە دەبیسترا ئاماژەی بەوە کرد، گرووپە چەکدارەکان بە درۆن و چەکی قورس هێرش دەکەنە سەر نەخۆشخانەکانیش کە ژمارەیەکی زۆر برینداریان تێدایە و رێگە بە دەربازبوونیان نادەن.
بەیانیی ئەمڕۆ دەستەی ئۆپەراسیۆنەکان لە سوپای عەرەبیی سووریا رایگەیاند، ئۆپەراسیۆنی گەڕەکی شێخ مەقسوودیان لە شاری حەلەب بە تەواوەتی کۆتایی پێهێناوە و سەربازەکانیان بڵاوەپێکردووە. هاوکات میدیای بەڕێوەبەرایەتیی خۆسەر ئەوە رەتدەکاتەوە و دەڵێت، پێکدادان بەردەوامە.
ئەم پێکدادانانە لە کاتێکدان کە وڵاتانی وەک ئەمریکا، فەرەنسا، ئووردن و کەنەدا داوای راگرتنی شەڕ و جێبەجێکردنی رێککەوتنی 10ـی ئاداری 2025 دەکەن، کە تایبەت بوو بە تێکەڵکردنی هێزە کوردییەکان لەناو دامەزراوەکانی دەوڵەتدا، بەڵام بنبەستی سیاسی وایکردووە جارێکی دیکە "رێگەی شەڕ" لە حەلەب بێتەوە پێشەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ