رووداو دیجیتاڵ
وەزارەتی ئەوقافی سووریا گشتاندنێکی فەرمی ئاراستەی پێشنوێژ و گوتارخوێنانی هەموو مزگەوتەکانی وڵات کرد و داوای لێکردن، لە نوێژەکاندا نزا بۆ سەرکەوتنی سوپا بکەن و بە دەنگی بەرز تەکبیر لێ بدەن، وەک دەربڕینی خۆشی بۆ ئەو "سەرکەوتنانەی" کە سوپا عەرەبییەکە لە رۆژهەڵاتی وڵاتەکە بەدەستی هێناون.
بەپێی ئەو بەڵگەنامەیەی کە واژۆی دکتۆر محەممەد ئەبو خەیر شوکری، وەزیری ئەوقافی سووریای لەسەرە و رۆژی 18-01-2026 دەرچووە، داوا لە مزگەوتەکان کراوە ئەم هەنگاوانە بگرنە بەر:
کردنی نوێژی "قونووت" لە هەموو پێنج نوێژە فەرزەکەدا لە سەرتاسەری وڵاتەکە، بۆ سەرکەوتن و پشتگیریکردنی سەربازانی سوپای عەرەبیی سووریا.
هاندانی هاووڵاتییان و گەلی سووریا بۆ نزا کردن و پاڕانەوە بۆ ئەوەی دۆخەکە بە تەواوەتی جێگیر بێت.
لێدانی تەکبیر لە ناو مزگەوتەکان وەک نیشانەیەک بۆ ئاهەنگگێڕان بەبۆنەی ئەو "فەتح و سەرکەوتنانەی" کە سوپای عەرەبی لە ناوچەکانی رۆژهەڵات تۆماری کردوون.
ئەم فەرمانەی وەزارەتی ئەوقاف لە کاتێکدایە کە لە 24 کاژێری رابردوودا سوپای عەرەبیی سووریا پێشڕەویی گەورەی لە ناوچەکانی رۆژهەڵاتی فورات، تەبقە، رەققە و دێرەزوور کرد. ئەم گۆڕانکارییانە دوای کشانەوەی هێزەکانی سووریای دیموکرات (هەسەدە) هاتن لە چوارچێوەی رێککەوتنێکی 14 بڕگەیی کە رۆژی یەکشەممە راگەیێندرا.
بارودۆخی مەیدانی بەرەو ئاڵۆزییەکی زیاتر رۆیشتووە؛ هەسەدە حکومەتی دیمەشق بە هێرشکردنە سەر زیندانەکانی داعش و "تاوانی جەنگ" تۆمەتبار دەکات و دەڵێت، کۆنترۆڵی زیندانی شەدادییان لەدەستداوە. لە بەرامبەردا، حکومەتی دیمەشق ئەم پێشڕەوییانە بە "گەڕانەوەی سەروەریی دەوڵەت" و "تێکشکاندنی تیرۆر" دەبینێت و داوا لە دامەزراوە ئایینییەکان دەکات رۆڵی خۆیان لە پشتگیریکردنی ئەم قۆناخەدا بگێڕن. هاوکات لیندزی گراهام، سیناتۆری ئەمریکی هۆشدارییەکی تووندی داوەتە دیمەشق و داوای کردووە، ئەمریکا راستەوخۆ بەرگری لە زیندانەکانی داعش بکات تاوەکو کارەساتی گەورە روونەدات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ