هەڵەیەک روویدا! دووبارە هەوڵبدە
رووداو دیجیتاڵ
سەرۆکی پارتی سەرلەنوێ رەفاهـ بە پێویستی دەزانێت تورکیا کشانەوەی خۆی لە پڕۆژەی رۆژهەڵاتی ناوەڕاستی گەورە بکشێتەوە و بنکە سەربازییەکانی کورەجیک و ئینجیرلیک دابخات.
فاتیح ئەربەکان، سەرۆکی پارتی سەرلەنوێ رەفاهـ، لە تۆڕە کۆمەڵایەتیدا، هەڵسەنگاندنی بۆ گرژی و جەنگی نێوان ئەمریکا و ئیسرائیل کرد.
ئەربەکان ئیسرائیلی بە "داگیرکار" ناوبرد و رایگەیاند، ئەگەر تاکە هێزێک بتوانێ بەرەنگاری ئەمریکا و ئیسرائیل ببێتەوە و فراوانخوازیی ئیسرائیل رابگرێت، تورکیایە.
هەروەها گوتی: "تورکیا ئەکتەرێکی راستەقینەی ناوچەکەیە، دۆستێکی متمانەپێکراوی گەلانی دێرین و داهاتوویەکی هاوبەشە. وەک چۆن هاوکێشەی رۆژهەڵاتی ناوەڕاست بەبێ تورکیا دروست نابێت، بە هەمانشێوە هەڵوێست و لێدوانە هەڕەشەئامێزەکانی دژی تورکیا، تەنیا چەواشەکاری و هەڕەشەی پووچن."
"پێویستە کورەجیک و ئینجیرلیک دابخرێن"
ئەربەکان جەختی لەوە کردەوە کە پێویستە تورکیا هەنگاوی کردەیی بنێت و گوتی: "تورکیا بۆ ئەوەی ببێتە هیوایەک بۆ ئەوانەی متمانەیان پێیەتی، دەبێت کشانەوەی خۆی لە پڕۆژەی رۆژهەڵاتی ناوەڕاستی گەورە رابگەیێنێت. هەروەها پێویستە بنکەی راداری کورەجیک و بنکەی ئاسمانیی ئینجیرلیک دابخرێن. هەروەها گرووپی D-8 چالاک بکرێتەوە و هەڵوێستێکی پتەو بەرامبەر ستەم و نادادپەروەرییەکان نیشان بدرێت."
"پێویستە هێرشی دیپلۆماسی بکرێت"
سەبارەت بە هەڵوێستی وڵاتانی کەنداو کە لە دژی ئێران پشتگیریی ئیسرائیل دەکەن، ئەربەکان داوای دەسپێشخەریی دیپلۆماسی کرد و رایگەیاند، ململانێ مەزهەبی و نەتەوەییەکان لە وڵاتانی ئیسلامی، لە چوارچێوەی پلانێکی پێشوەختەدا داڕێژراون.
لە کۆتاییدا ئەربەکان ئاماژەی بەوە کرد، پێویستە تورکیا بەرامبەر گۆڕانکارییەکانی ناوچەکە، سیاسەتێکی دەرەوەی چالاکتر و بڕیاردەرانەتر پەیڕەو بکات.
پێشتر چەند جارێک ئەنقەرە بەوە تۆمەتبار کرابوو، کە گوایە ئیسرائیل لە بنکەی کورەجیک کە دەکەوێتە پارێزگای مەلەتیی باکووری کوردستان، زانیاری وەردەگرێت. بەڵام حکومەتی تورکیا ئەمەی رەتکردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ