رووداو دیجیتاڵ
وەزیری دەرەوەی تورکیا لەبارەی گرژی و ئاڵۆزییەکانی ناوچەی دێرەزوور پەیامێکی ئاراستەی ئەمریکا کرد و دەڵێت، "پێویستە کۆتایی بەوە بهێندرێت کە تیرۆری یەپەگە وەکو هێزێکی شەرعيی نیشان بدرێت. ئەگەر وانەبێت ئەو شەڕ و پێکدادانانەی لە دێرەزوور بینیمان تەنیا سەرەتایەکە."
ئێوارەی رۆژی چوارشەممە 6ی ئەیلوولی 2023 هاکان فیدان، وەزیری دەرەوەی تورکیا لە ئەنقەرە لەگەڵ ئۆلیڤەر ڤارهیلی، ئەندامی کۆمیسیۆنی یەکێتیی ئەوروپا بۆ کاروباری دراوسێ و فراوانکردنی پەیوەندییەکان کۆبووەوە و دواتر کۆنگرەیەکی رۆژنامەڤانیی هاوبەشیان رێکخست.
لە کۆنگرە رۆژنامەڤانییەکەدا، وەزیری دەرەوەی تورکیا رایگەیاند، "چاوەڕوانیمان لە یەکێتیی ئەوروپا ئەوەیە بوێرانەتر هەڵسوکەوت بکات لە پێناو پێشوەچوونی پەیوەندییەکانمان."
هاکان فیدان ئاماژەی بەوەش دا، گرژی و ئاڵۆزییەکانی نێوان هۆزە عەرەبەکان لە سووریا دژ بە یەپەگە بابەتێکە پێشبینییان بۆ کردبوو.
لەوبارەیەوە فیدان گوتی، "نابێت کەس لە خاکی خۆی دەربکرێت و ملکەچیی کەسی دیکە بکرێت. واتە، گرنگە عەرەبەکان و تورکمانەکان و کوردەکان، هەمووان لە شوێنی خۆیان بژین، بەڵام یەپەگە کە ئەمریکا پشتیوانیی دەکات، بە داگیرکردنی خاکی عەرەبی، بەتایبەتی ئەوانی ملکەچ کرد و ژێردەستەی کردن، پێش ماوەیەکی زۆر ئێمە پێشبینیی دەستپێکی ئەم جۆرە هەوڵانەمان کرد."
گوتیشى، "پێویستە کۆتایی بەوە بهێندرێت کە تیرۆری یەپەگە وەکو هێزێکی شەرعي نیشان بدرێت. ئەگەر وانەبێت، ئەو شەڕ و پێکدادانانەی لە دێرەزوور بینیمان، تەنیا سەرەتایەکە."
وەزیری دەرەوەی تورکیا داوایەکی ئاراستەی ئەمریکا کرد و گوتی، "دەبێت لە ناوچەکەدا کۆتایی بە سیاسەتی گوشار بهێندرێت، بەتایبەتی گوشار خستنە سەر عەرەبەکان بە دەستی یەپەگە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ