رووداو دیجیتاڵ
وەزیری ناوخۆی تورکیا رایگەیاند، لە ئۆپەراسیۆنێکدا کە لە 21 پارێزگای تورکیادا بەڕێوەچوو، دەستیان بەسەر 121 چەکی قاچاخ و چوار بازرگانی چەکدا گرتووە.
ئۆپەراسیۆنەکە بە هاوبەشیی فەرماندەیی هێزەکانی جەندرمە و بەڕێوەبەرایەتیی گشتیی ئاسایشی تورکیا بووە و تایبەت بوو بە دەستبەسەرداگرتنی چەکی بێمۆڵەت لە جۆری دەمانچە و تفەنگ.
یەکشەممە 12ی ئایاری 2024 عەلی یەرلیکایا، وەزیری ناوخۆی تورکیا، لە هەژماری تایبەتی خۆی لە تۆڕی ئێکس بڵاویکردەوە، لە یەک رۆژدا تیمەکانیان لە 21 پارێزگای تورکیا و باکووری کوردستاندا، دەستیان بەسەر 121 دەمانچە و تفەنگی بێمۆڵەت، 155 پارچەی یەدەگی تفەنگ، 70 دەمانچەی پۆلیمەر و 619 پارچەی یەدەگی چەکە جیاوازەکان و فیشەکەکانیاندا گرتووە. هەروەها چوار کەس بەتۆمەتی بازرگانی بە چەک دەستگیر کراون.
بەگوێرەی راپۆرتی 2023ـی دەزگای ئوموت بۆ بەرەنگاربوونەوەی تووندوتیژی و کەمکردنەوەی خاوەندارێتی چەک، پارساڵ سێ هەزار و 773 تاوانی کوشتن بە چەک کراوە، بەهۆیەوە دوو هەزار و 318 کەس کوژراون و سێ هەزار و 820 کەس بریندار بوون.
دەزگای ئوموت دەڵێت، "بەرامبەر هەر چەکێکی مۆڵەتدار، 9 چەکی بێ مۆڵەت هەن." دەزگاکە مەزەندە دەکات 36 ملیۆن چەکی بێ مۆڵەت لە تورکیا هەبن.
![تیمەکانی فریاگوزاری لەکاتی گەڕان و رزگارکردن لە شوێنی [ئەنقەرە] تێکشانی فڕۆکەیەکی بازرگانی کە بەرەو لیبیا دەچوو، کە جەنەڕاڵ محەمەد عەلی ئەحمەد ئەلحەداد، سوپاسالاری لیبیای هەڵگرتبوو. وێنە: AFP](https://www.rudaw.net/s3/rudaw.net/ContentFiles/921562Image1.jpg?mode=crop&quality=70&rand=1&scale=both&w=362&h=226&version=8325617 "تیمەکانی فریاگوزاری لەکاتی گەڕان و رزگارکردن لە شوێنی [ئەنقەرە] تێکشانی فڕۆکەیەکی بازرگانی کە بەرەو لیبیا دەچوو، کە جەنەڕاڵ محەمەد عەلی ئەحمەد ئەلحەداد، سوپاسالاری لیبیای هەڵگرتبوو. وێنە: AFP")
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ